Khrih thawngttha nih Muslim ram a simi Islamic world zong mei phalh in a phalh thluahmah cang. Muslim ram ah Khrihfa an karh i biakinn zong an karh chin thluahmah cang. Iranian Revolution Iranian Muslim leader pakhat nih Iran ram ah Khrihfa hi a phuphu in an karh chin thluahmah ko, tiah a chim. 1979 ah khan Iranian Revolution timi cu rak thok a si i Islamic pawl nih fekte in rak uk an si.

Khrihfa pawl hna cu a lamkip in hrem le tthawldawi tu chun ni tiang an si. Hi an uknak chung ah a ummi missionaries pawl vialte hna zong tthawl le dawi an si. Khrihfa Bible le biakinn hna zong khar pial le hrawh piak an si hna. An ram chung ah thawngtha chim hi a cozah phungbuar pakhat ah an chiah. Cu caah khrihfa pastor tampi le zumtu tampi hna cu a thah tiang in thah an si hna. Iran ram khrihfa hna hi mi tlawmte an si i biakinn tthatthi hmanh an rak ngei kho loh.

An nung chuak kho ngai te hna maw, tiah rak ruah an si.A sinain Khrih dawtnak, an tlaihchannak cu an chung ah mei bang in a kangh in a kangh caah tu kum tiang a karh in an karh chin thluahmah ko. Cu lawng hmanh silo in Iran ah a ummi Muslim tampi hna cu Khrihfa ah an i leet/thleng/cang thluahmah cang. Reports nih a chimning in, Iran ram ah hin Khrihfa a simi hi minung 1 million renglo an si cang. Hi hna nih hin a thlite in Khrihfa zumhnak le biaknak hi an tuah peng, tiah theih a si.

Iranian  Muslim Leader Chimmi: 2016 ah khan vawleicung ah Evengelical Church a karh biknak hmun le a tthan biknak hmun hi Iran ah a si. Hi bantuk in Islamic ram ah Khrihfa an karh thluahmahmi nih hin Iranian Islamic hruaitu pawl cu a kan lauter ngaingai ko. Shia Muslim hruaitu mifim pawl hmunkhat i an i pumh lio ah Minister Mahmoud Alavi nih Muslim pawl Khrihfa an a phuphu in an lut, ti hi fiangte in a cohlannak kong a chim. Kan mithmuh hnga bak ah hi bantuk thil hi an cang ko, tiah a chim chih. Cu caah Khrihfa ah a cangmi hna he zei tin dah kan i pehtlaih ning le biahalnak kan ngeih hna ning a si lai timi tu an ruat. Mahmoud hi Muslim ram a kauh khawhnak ding caah ti in faakpi in a ttangmi le Khrihfa hna zong a rak hrem lengmangtu a si.