Iran Nih British Oil Phurtu Lawng An Tlaihpiak, President Trump Le British Foreign Secy Nih Bia An Chim Colh

Iran ralkap nih Strait of Hormuz, Persian Gulf tipi ah British oil phurtu lawng “Stena Impero” (Stena Bulk), 30,000 tons a ritmi , crew 23 umnak cu nizan suimilam 9pm (local time) ah khan thaihpiak in hranren. Hi thil ruangah Middle East buaibainak a hnuarsuan chinchin ti a si.

Hi kongah Jeremy Hunt, British Foreign Secy nih hi bantuk international waters- i lawng thil phur bal ve lomi hren/ tlaihpiak hi (unacceptable) a si hrim lo. Buainak zualter chin cu kan duh lo, diplomatic hmangin hi kong hi buaipi kan duh, mah i a si khawh lo ahcun hi nih thil sining a fianter dih ko lai, sinain a si khawhchung in tlamtlin khawhnak kan i zuam lai” tiah a chim. Iran nih cun mah lawng (Stena Impero) nih hin “Iran’s maritime law” buar in kan nawlngaihnak chungah a rak luh ruangah, Iran Navy hna nih Iran’s Revolutionary Guard Corps kutah an pek tiah an chim ve.

Mah lawng si loin Iran nih hin nizan suimilam 7:30pm (local time) ah khan lawng dang pakhat, British oil tanker tthiamtthiam, Mesdar oil tanker tlaih dingin Iran Navy hna nih an luh hnawh nain a hnu ah an thlah tthan. Mah Mesdar oil tanker hi Norbuld Shipping UK Ltd ta tthiam a si, cun Liberian flag a zar asi. Hi kong he pehtlaiin Mike Pompeo, US Secy of State le Jeremy Hunt, British Foreign Secy hna nih Strait of Hormuz thil cang mi kawngah ceihkhannak an ngei lai.

Iran thiltuah mi kongah President Trump zong nih a timi cu Iran thiltuah mi hi pawm khawh dingmi si lo, tiin a chim ve. “US nih Britain cozah nawl ning in hma a lak lai”tiah a chim. British nih hin Iran oil tanker Grace-1 cu Gilbralter Island, Spain ram chungah a luancia mi ah khan a rak tlaihpiak i, hi ruangah Iran thinhun atu bantukin lehrulnak a si lai tiah zumh a si. British oil tanker hi Saudi Arabia ram kal ding a si.

Strait of Hormuz – Persian Gulf ah hin June thla thawk khan nihin tiangah Oil tankers 6 tlaih a si le kah an ton tikah US nih cun Iran tuah mi lawngte si tiin a puh. Hi bantukin Iran-nih British oil tanker a tlaihpiak ruangah Crude Oil man hi 0.6% bakin a kai manh i, barrel khat ah US$ 55.63 si colh. Cu lawng si loin Brent Crude Oil zong US$ 63 per barrel si colh. US-Iran an kar ral a thawh sual ahcun vawlei cung Oil man kai in, barrel khat ah US$ 320 tiang a phan lai tiin chut si cang. Strait of Hormuz hi vawlei cung lawng hmangin oil phurh chuahnak 1/5 tling kho mi si ruangah a biapi taktak mi pakhat si.