Iran Nih Biafiang Chim In Thanhnak An Tuah ve Cang. Iran cozah nih Ukraine khualtlawng phur vanlawng Boeing 737 cu kanmah kahmi asi tiah official-in in thanhnak an tuah cang. Hi kong cu President Hassan Rouhani nih Twitter ah a ttial i, kan tuah sualmi a si, kan i timhmi zong asi lo, kan kah sualmi (unintentionally shot down) asi. Minung nih tuah sualmi (human error) khi asi. Cun, hi kong hi biatak tein hlathlai asi ko tiah a chim fawn.

Hi kong he pehtlaiin Mohammed Javed Zarif, Iran Foreign Minister nih a chim mi cu hi bantukin ttihnung le ngaihchiatnak a tlungmi hi US ruang le ramri i kahnak ruangah asi tiin, US cu sual a phawt ve. Vanlawng kah asi nak kongah Justin Trudeau, Canadian PM nih cun felfai taktak in kah asi nak ruang hi hlathlai le kah asi hrim ko timi tehteh an ngaihnak kong cu a rak phuan cang.

Mah Boeing 737 vanlawng ah hin khualtlawng le Crew member 179 an cuang hna i, a thi mi lakah Canadian 63, Iranian 82, Ukrainian 11, Swedish 10, Afghan 4, German 3 le British/UK minung 3 an tel i, an lakah hngakchia kum 9 le a nu nunnak a liam chih.

Kum 2014 ah khan Ukraine ramchung, Russia ramri pawng Ukraine dohtu ralhrang umnak Donetsk region ah Ukraine le pro-Russia karlak buainak a chuah lio ah Malaysian khualtlawng phurtu MH-17 cu Russian sermi Buk surface-to -air missile hmangin, Ukraine ramri chaklei ah kahthlak a rak si bal cang.