Freedom Fighter Pu Darthawma, kum 99, Chanmari Lunglei ah tuzing ahkhan mual a kan liam taak tiah theih asi i, tuni ah ruak vuinak caan an hmang. Pu Darthawma hi May ni 15 1921 ah a chuak i, hi caan lio ahhin British uknak tangah India hi a um lio asi i, 1939 ah khan Ralpi 2nak(war world 2)a chuak i, Pu Darthawma le mizo tlangval a dang minung 17 hna cu ralkap an lut ve i Indian Army Medical Corps ah 1940 ah an rak um ve.

 

Hi hnu tlawmpal ah cun Ralpi 2nak (war world 2) cu a hung dai thluahmah i, Pu Darthawma cu Pu Netaji Subhas Chandra Bose huainak tangah Indian National Army a pehzulh peng i, kum 3 chung Indian National Army ahhin a um i, British ralkap hna nih British kalphung kalhin a um tiah an ti an tlaih. Chittagong le Calcutta Jail ah thlak asi hnuah ramchung politic sining a von i thlen hnu 1945 ah Lucknow Jail in an rak chuah.

India Cozah nih sunlawihnak Tamrapata cu kum 1972 kum ahkhan Pu Darthawma sinah pekchanh asi. Pu Darthawma hi anun chungah tuanbia dawh ttial in le ram le miphun caah nunnak pek in rianttuanmi asi i, atu ah cun hi harsatnak vawlei, duh tlin lonak in a kan taak cang. Tantaakmi chungkhar Bawipa nih hnem ko hna seh!