Kan theih bantukin atu lio zawtnak Covid-19 nih India ram pi zong nikhat hnu nikhat in a den chin lengmang ve. Cu tikah cozah nih zawtnak a karh chinnak hnga lo tiin ni 21 chung kharkhumh (lockdown) an tuah nain zawtnak cu reh lei panh loin zual leitu a panh chin chin ruangah May ni 3 tiang lockdown a peh tthan.

Atu nihin tiang India ramchung zawtnak a ngeimi hna hi minung 11,555 nih zawtnak an ngei i, 396 an thi i,1,362 hi a dam tthan mi an si hna. Hi kong he pehlaiin zawtnak ruangah India ramchung ramdang minung tampi anmah le khua ah kir kho loin hotel ah a tangmi tampi an um hna.

India ramchung lawng si loin vawleicung hmanh ah biaknak lei in minthang simi Rishikesh (Ganga River) tiva ah picnic a kalmi ramdang mi minung 600/700 tluk an tang hna. April/10 zinglei ah ramdang mi minung 10 cu cozah nawl chuah mi zul loin Ganga tiva hram ah kal in an tthut ruangah police nih an tleih hna.

Lockdown tuahmi nan theih ko nain nan zulh duh lo ruangah tiin hremnak an pek ning hna cu aa phundang taktak. Hremnak an pek ning hna cu,”Lockdown nawl chuah mi ka zulh lo ruangah I am sorry” timi cafang voi 500 cio an ttialter hna i, mah hnu nan chuah rih ahcun thong kan in thlak cang hna lai, tiin an tlunnak hotel ah an lawiter hna. Ref: Timesofindia