ICJ tazacuai nakah Suu Kyi kalding Kawl Ralkap an I lawm: ICJ i tazacuaimi kongah Daw Aung San Suu Kyi a kal ding cu Kawl Ralkap nih kan dirkamh an ti, An ilawm khe lai ta. Rohingya pawl cungah ralkap nih a thiltuah cu cii-hmih timh ‘genocide’ a si tiah ram 40 leng nih Kawlram hruaitu pawl taza an cuai caah an lau ngai fam cuteh.

Aziah Suu Kyi pumpak in kal ai timh hnga? Foreign Minister a si ruangah maw? Ralkap he tiamkamhmi ‘give an take’ an ngeih caah maw si hnga? Amah pumpak hrimhrim zong a kut ah thisen ai nalh ve ruangah, mah-le-mah ivennak caah dah a si hnga? Afiangmi cu ralkap pawl hna a ngamter hna. Adonghnak ahcun hmunkhat ah an dirti theo.

 

Gambia ram nih ICJ ah taza cuaimi kha Myanmar rampi sovereignty ‘achohachia’ a hnursuan tiphun in bia a chimmi hna kan um, Hihi hlennak a si. A taktak ahcun Rohingya pawl cungah kutthlaknak a tuahtu pawl kutchumkhat pawl lawng nih an intuar dingmi a si– ram mipi million 51 he zeihmanh pehtlaihnak a um lo. Cheukhat nih kan rampi pei a muichiatter teih-kha-ciah’ cu an ti. Zeitikah dah kan rampi cu a mui tthat in teihkha cu a ngeih bal?

ICJ kong Suu Kyi hlawhtlinnak ding caah thlacam sawmtu Khrifa-Laimi zong kan um hoi. Theih awk cu ICJ timi cu dingthlu ‘justice’ tein lairel seh tiah UNO pi nih sermi a si. ASSK le Min Aung Hlaing nih hruaimi Kawl ralkap-cozah nih Rohingya cungah an thil tuahmi hi genocide sualcipit a si maw si lo timi kha kongceih an thawk lio a si, An sual-suallo biaceihnak a um rih lo.

Cucaah Khrifa thami nih thla kan cam ding cu ICJ nih “Justice and si bang” dingthlu tein lai an rel khawhnak ding tu kha a si. Dinnak kha ti bang a luannak hnga. Amos 5:24 tu kha thlacam ding kan si. A palh zong palh lo zongah anih nih a tei khawhnak hnga tiphun in thlacam phung si lo. Credit: Salai Ceu Bik Thawng