ICJ ah Gambia cozah nih taza cuai mi Pi Suu nih a tei ahcun: 1. Vawleipi thangthat a hlawh lai maw? Asilole an soisel (lungrumh) lai dah? 2. Ramchung, a bik in Tlangcungmi sin ah remdaihnak a chuahter in a bawm lai maw?
3. Tlangcungmi, cozah, Ralkap, ramkheel party pawl le Pi Suu kar ramkheel kaarhlan a fehter lai maw? A zorter lai dah? 4. Tutan an dirhmun bantuk in Ralkap (Min Aung Hlaing) le NLD (Pi Suu) hi kan ramkheel ah an tangti thai lai maw?

5. Ramdang nih Myanmar cozah an hmuhning, an pehtlaih ning le an dirkamh ning a fehter lai maw? A zorter lai dah? 6. Nihin Myanmar ram ramkheel a ke aa chuih/aa taapnak lungpi a si mi Rakhaing ram buainak a siamremh (phisin) lai maw? Rakhiang le Rohingza kar ah mei kau thantu a si kho lai maw? 7. Rakhaing (AA) le Chin (Paletwa) buainak a kan siamremh (phisin) lai maw? A zualter lai dah? 8. Ralkap nih Tlangcungmi cung ah kahdohnak le nuhrin covo a buar cuahmah mi a ngolter lai maw? Ralkap thapetu dah a si lai? 9. Vawlei cung Muslim miphun le biaknak nih kan ram an hmuhning a nemter lai maw a thawnter lai dah? 10. Ralkap (Min Aung Hlaing) nih Pi Suu a tihzah in a tang ah a dorter lai maw? A lorter lai dah?

Nihin micheu cuanh ning cheukhat cu: 1. A cheu nih: “Pi Suu an dirkamh. A palh lo. A tei lai. Kan zumh. Amah a kal mi hi a rian a si. Rohingza cung ah nuhrin covo lonh (cii hmih timh) in cozah le ralkap nih an buar lo. Tlangcungmi sin zong ah Ralkap nih cuti tiang in a buar lo. Pi Suu nih “Kan ram ah Rohingza miphun an um lo, Tlangcungmi an si lo” a ti mi a dik. Rammi nih kan dirpi awk a si. Tlangcungmi zong nih kan dirpi awk a si…” an ti.

2. A cheu nih: “Ralkap nih an buar mi a si. Cucu dirkamh (pheh) piak a timh. Cucu a palh. Cun Ralkap nih Rohingza an rak thah le thawl hna lio ah amah zong nih ralkap tha a rak pek, dirkamh hna. Rohingza lawng si lo in Tlangcungmi cung ah Ralkap nih nuhrin covo a lonh mi a mit le a hna aa cheh i Ralkap a dirkamh. Mee a petu Kawl miphun le Ralkap a tih hna ca ah cucu thlachiatruat lo in a tuah. Cu ca ah amah hrim hi Rohingza cung lawng si lo in Tlangcungmi cung ah nuhrin covo a lonh ve. Ralkap sual khuhpiak aa timh mi cu a palh,” an ti.

Nang zeitin dah na ruah ve? Hi taza cuai hi a men lo mi a si. Kan ram ramkheel ca ah a result a tlawm in a hmete lem lai lo. Credit: Lalawm Puia