Myanmar ram hlasa minthang Mee Mee Khel cu cancer zawtnak in caan saupi aa thlopbul hnu ah October 16 ah Australia caan zaan sml 9:31pm ah a nunnak a liam. Mee Mee Khel cu Kum 37, a si i Khrihfa zumtu ṭha taktak a si. Atu bantukin mual a kan liam taak cu a pam tuk hringhran.

Amah hi hnuk cancer stage (4) si i a cancer cells cu a ruh tiang a phan cang. Sizung ah caan saupi aa thlop hnu ah a thih hi a si. “Sibawi te nih a sau na nung lai lo an ka ti lio ahhin kan fale zong an ngakchiat tuk rih tikah keimah le kan pa cu kan ṭap len. Nain, keimah cu a lung ṭhawngmi ka si.

“Ka nun chungah harsatnak tampi ka ton bal cang. Kan pa nih ka thi lai timi ruahnak ngei loin zeitin dah ka nun lai timi lawng ruah dingin a ka forhfial caah tlukrilh loin ka ṭhawnnak a si,” tiah Mee Mee Khel nih a rak chim.

Mee Mee Khel hi fa pathum ngeimi a si. A vaṭhing Htoo El Lynn he pakhat an ngei i, atu i a va pa he pahnih an ngeih. A vaṭhing Htoo El Lynn he an ngeihmi hi upa bik a si i, Htoo El Lynn sinah a um. Cun, a dang a fale pahnih cu Brice sinah an um.

Tuni October 17 hi a pasal Brice he an ngeihmi a ngakchia bik Narnia kum 5 a tlinnak chuahni a si. A fale caah a fak khun ko mu. Hringtu a nu Mee Mee Khel nih nizaan ah thih taak hna i tuni an fahniang chuahni a si. A pasal caah zeitluk in dah a fah lai mu. A fale a zoh hna ah a celh ve hrim lai lo. Bawipa tu nih an ngaihchiatnak hnem hram ko hna seh!