Hram thukpi ah a thla rih lomi Ramkheel party kung cung ah kai I timhlah an puur pi lai. By: Rolian. Myanmar ram chung ah Ramkheel Party tampi Party tampi an um. Hmailei zong ah Party thar an i chap thluahmah kho rih. Zeibantuk Party nih an in len kai le soilem zong ah mipi lei nih nba ruah ding mi cu, hi Party hi hram thukpi ah thla maw thlichia tilet a thawh tik ah a puur lai maw ti kha fiang tein na ngiat hmasa hnu ah cohlan ding le cohlan lo ding biachahnak tuah a herh.

Miphun/Mipi aiawh tu Party thim ding: Zei bantuk Party nih an in len kai zong ah Miphun a aiawh maw ti khan a hngalh hmasa aherh. Aiawh kan ti tik ah anmah nih maw miphun kan aiawh an ti mipi nih dah Miphun kan aiawh ter hna ti zong hngalh a herh. Mipi nih fial loin Miphun min hmang in Party an dirh mi cu Mipi theihpi mi le fialnak thawng in dirh mi a si maw? Anmah nih dah an dirh I a hnu ah member dah an kawl? Member kawl cu a sual mi le poi mi a si lo. Mipi tu nih fialmi le dirh mi Party a si a herh.

Chin Party hi kan hua hrim hrim lo. NLD kong kan tial poh ah anmah nih Chin Party nan huat aa kan ti. Kan Miphun aiawh tu a sit e ding mi Party a si i kanmah le kan politic cio ningin a can a za kan ti tik ahcun kan dirpi vete ko lai. Chin Party nih Miphun kan aiawh an ti mi hi mipi lei nih ruah taktak a herh. Zei tindah miphun an aiawh ning Chin ti biafang aa tel ruang ah maw Miphun kan aiawh an ti hnga? Chin Ramkulh ah Pengkulh lian pakua kan um.

Hakha, Thantlang, Falam, Mindate, Kanpalet, Paletwa, Matupi, Tedim le Tonzaang kan um. Miphun pi pakua lak ah miphun pathum lawng nih zeitin dah Miphun pakua nan aiawh khawh ning. Tahchunnak ah Tedim lei mi hna nihcun Chin ti an duh lo i Zomi an i ti ko khih. Chin duh mi cu Chin an duh lo caah Chin Party zong nih nan aiawh kho hna lo ti cu a fiang. Party pathum nan i fonh hlan ahcun CPP, CLD le CNDP ti in nan rak um. Hi Party pakhat cio hi hruaitu hna ruahnak in rak dirh cio mi a si. A hramthawk tein an policies an dan caah Party dang cio an rak si. A minung i rem lo ruang le miphun pakhat chung in ca le holh an I dan ruang men ah Party dang an rak derh lo, an policies aa dannak le I khah lonak um ruang ah Chin Ram ah Party pathum a rak um mi a si.

Asinain Party pakhat cio thazaang a tlawmtuk caah aa fonh mi an si. Party cu aa fonh i mipi cheu khat zong an fonh hna nain lutlai an i fonh lo. An lak i hruaitu pakhat nih Swetzealand ram federal azuk phung le party kal ning in kan kal ve a ti. Asinain Swetzealaned ram federal zauk phung lutlai hna kal ning he an i kalh fawn. Hruaitu an i fawnh ning zoh tik ah these cung inn sa mi bantuk an si. Kawlte phungthluk ah tilawng mawngtu an tam ahcun tilawng a rawk an ti mi kha chuah sual a fawi.

Zei he dah tahchun ah a khen bik lai: Ahram thawk tein Party policies a rak i dang i Party muisam a rak i dang ko mi van i fonh i a kumpi a fonh lo mi cu vuur in peh mi theikung he an i khat ko. Vuur in pearl theih apple le miraang khuhlu kan peh i kung khat ah thei phun pathun cu thei an van tlai tik ah ei khim le barkhim a tlai kho bal lo. Cu bantuk in Politicies a rak i dang ngai mi Party pathum an peh mi cu vuur in peh mi thei phun bantuk an si. Cucaah mipi caah eikhim le barkhim thei tlai kho ding cun zumh awk a tha lo.

Kamh mi an ngei lo: Zei bantuk Ramkheel party poh nih cozah ser taktak a ngam i mipi sin ah raltha tein cu kamh mi tuah piak ding an ngei cio. An vatuah khawh le khawh lo cu vawlei cung phung a si. Naite ah Pu Zo Zaam US a kal lio ah Chin Community nih biahalnak an tuah i Cozah nan ser khawh ahcun zeidah tuah piak ding in Chin Miphun nan kamh hna? kamh mi nan ngei maw? Tiah an hal tik ah kamh mi kan ngei lo, asinain tuah ding tiah ruah mi cu a tam pi tiin a leh hna. tuah ding vial hngalh ko ahcun ziah mipi caah tuah ding an kamh khawh hna lo? Ruah ngai a herh. Hihi mah le mah i zumh ngamnak a um lo caah a si. NLD Party cu mipi le 88 siangngakchia nih dirhmi a si. Cu nih a langhter mi cu miphun le rampi a aiawh ti kha a lang. kan peh than te lai. TVOD