Holh Theihlo Cu Phuahchom Lih A Si Tiah Dr. Aung Myint Thang Nih A Doh Lio Ah Rev. Thawng Zam Nih Cun Holh Theihlo A Pom Lomi Cu Thlarau Ting Lo Mi An Si  A Ti Ve. Zeidah Kan Zumh Lai?- Video

Laimi khrihfa mi lak ah a linsa ngai ton lengmang mi pakhat cu holh theihlo kong hi a si. Cheukhat Pathian rianttuantu nih holh theihlo hi Bible hrimhrim ah a ummi a si tiah an aupi. Cheukhat Pathian rianttuantu nih holh theih lo cu Bible ah a um lo. Holh dang lawng a um, Holh theihlo timi cu mah nih phuahchom mi a si tiah fak piin a dohmi an um ve. Cu bantuk in thawngtha chimtu zong nih an hrilhfialh ning hi aa lo cio hna lo. Holh theihlo a pom mi hna nih an chim tikah a dik fawn. Nain a pom lo mi nih an chim ve tik ah adik ve fawn.

Cu tikah mi zei chimmi hi dah a dik lai timi zong a ngaitu lei nih i fian awk a har ngaingai mi a si. Cu bantukin Dr. Aung Myint Thang nih cun prophet hna le holh theihlo timi cu a dong cang i holh theihlo a um ti lo, atu lio Laimi holh theihlo timi cu mah nih phuahchom mi a si caah kanram ah holh theihlo timi hrim um ti hlah seh,”tiah fak piin a doh cang.

Cu tikah mi tampi zong holh theih lo kongah a vaivuan mi kan um cio hna lai dah tiah ruah khawh a si. Hi kong he pehtlaiin holh theih lo kongah Rev. Robert Thawng Zam nih cun holh theih lo cu zumtu mi nih kan ngaih in kan hman hrim awk a si. tiah fiang taktak in a chim ve. Cucaah Dr. Aung Myint Thang le Rev. Robert Thawng Zam chim mi hi ngaihin a ho chim mi dah kan zumh lai? Cun hi kongah nangtah zeitindah na hmuh ning a si ve? A tang hi Rev. Thawng Zam chim mi a si.

Note: hi hna pahnih hi pakhat le pakhat kar ah buainak chuahpi le bia all ter duh ruangah ttialmi si loin zumh mi aa khat ko mi le Pathian rianttuantu ve ve zong an si tikah an zumh mi le pom ning langhter duhnak a si. Cucaah mipi zong nih pakhat chim mi lawng zumh loin an chim mi le Bible zoh chih in cuai kan thlai awk a si ve.

Rev. Robert Thawng Zam: Holh theih lo cu zumtu hna Pathian fa kan sinak kan identity card pakhat bak a si. Cu lawng si loin zumtu mi nih Pathian rian kan ttuannak i Thlarau laksawng theipar pakhat zong si fawn. A ruang cu zumtu nih cun holh theihlo he kan i tthen awk a ttha lo i, amah Jesuh khrih biacah zong a si. Holh theihlo hi amah Jesuh nawl pekmi bak a si caah zumtu mi fa hna nih cun holh theihlo hi kan hman in kan ngaih awk hrimhrim a si.

Cucaah kan pa le zumtu ai timi hna zong nih holh theihlo an duh lo ahcun Thiang Thlarau an co lo tinak a si. A fiang ngaimi cu khamhnak cu a min men in an co nain a nung mi Thiang Thlarau khamhnak taktak an co lo i a nung mi Thiang Thlarau ngeimi nih cun holh theihlo hi an ngaih in an co hrim awk a si. Khmahnak thawngttha cu an chim len nain a nungmi Thiang Thlarau kong an chim ti lo. Holh theihlo nih a langhter duh mi cu kan damnak le kan rumnak a si. A sinain Laimi nih cun holh theih loin thla kan cam lo. Cucaah Laimi thlarau in kan dam khawh lonak a ruang cu holh theihlo kan hman duh lo ruangah a si. Cucaah holh theihlo a ngei lomi nih cun holh theihlo hi kan tin co lo ruangah faktuk in kan doh in kan soisel ding a si lo.

Mah caah holh theih lo a ngei ve lomi nih cun thla nan cam tik zongah minute 10 nan cam hmanh khi a sautuk mi ah nan ruah lai nain holh theihlo a ting co mi hna nih cun suimilam pakhat chung kan cam hmanh ah kan i za hrim lo, a ruang cu thlarau nih kan nun a hman ruangah a si. Kan i fian dingmi cu minung pakhat nih holh theihlo a holh tikah mipi ca a si ahcun thiang thlarau nih a let tu dingah minung pakhat a hman chih peng lai. Cun pakhat (private) ca lawng simi cu a let tu dingah thiang thlarau nih midang kha a fial fawn lai lo. Cucaah Jesuh zong nih holh theihlo a holh pinah amah nawl peknak a si bantukin zumtu mi nih cun holh theihlo hi kan hman ding hrim a si ko. Ref: Rev. Robert Thawng Zam

Aung Myint Thang: HOLH THEIH LO” MAW “HOLH DANG” DAH THIANG THLARAU I LAKSAWNG CU A SI?

1. Kan Baibal Biakam Thar cu Greek holh in an rak ttial. Greek Baibal ah holh theihlo timi biafang a um lo. Glossa ti a si i a sullam cu “tongue or language” tinak a si. Thiang Thlarau Thilpek cu langugage (holh) a si. Dididadalala ticu holh a si lo. Language a si lo. Language (holh) cu communication (cawnhbiaknak) tuah khawhmi khi a si. Lilidadafaffufu ti cu i chawnh khawh a si lo. Communication ai tuah kho lo. Holh asi lo caah. Cucaah Laimi holh theihlo hi cu dididadalalafufu ti asi caah hman dawh a si lo. Thiang Thlarau pekmi si dawh a si lo.

2. Kan Lai Baibal ah holh theih lo ti a um ko nan ti men lai. Kan Lai Baibal hi Good News (TEV) in lehmi a si. Kan Lai Baibal nihcun “holh theih lo” tiah a leh. Asinain hi an lehmi Mirang Good News ahcun “Strange tongues” ti tu a si i “holh dang” ti tu in leh ding a si deuh. “Unknown” ti hi “theih lo” tinak a si i “stange” ti cu “adang” tinak a si. Hi zawn ahhin Lai Baibal an lehning attha lo. Ahman lo. Mizo Baibal ah “Tawnghriat lo” ati caah an i cawnmi a si kho. Saya Hoi Cung Tum lehmi ahcun “holh dang” ti in aleh i hihi ahmanmi a si. Cucaah holh theih lo timi hi cu Lai Baibal an lehnak Good News hrimhrim ahhin hmunhma a ngeih lo caah nan holhtheih lo hi hman dawh a si lo.

3. Paul nihcun a lettu an um lo ahcun hmang hlah uh a ti (1 Kor. 14: 5). “Holh dang” or “miphun dang” holh cu leh khawh a si. Japan holh cu leh khawh a si. Didifaflala-lu-huhu ti cu leh khawh a si lo. Holh a si lo. Cucaah nihin nan holh theih lo hi cu hman dawh a si lo. Ttih a nung ngai.

4. Zumlotu hna caah hmelchunhnak a si a ti. Hlanlio zumtu hna cu miphun dang hna holh in Thiang Thlarau nih chimrel khawhnak Thlarau laksawng cu a rak pek hna (1 Kor. 14:22). An thiam ballomi holh in Thiang Thlarau thawngin bia an chim khawh tikah zumlotu hna kha an khuaruah a rak har tuk i Jesuh zumh khawh nak caah an rak hman. Sign a rak si. Didi-dada-lala-fafa- nan timi atu nan holh theih lo hi cu khuaruahhar ding zeihmanh a um lo. Zumlotu hna tluknak tu a si deuh. Cucaah nan holh theih lo hi hman dawh a si lo.

5. Atu i Laimi nih nan hmanmi holh theih lo hi Thiang Thlarau holh a si lo. Thiang Thlarau holh sisehlaw Thiang Thlarau hi mihrut asi hnga. Thiang Thlarau nih dididadalulu tiin a holh bal lo. Thiang Thlarau nih holh dangte a ngei lo. Thiang Thlarau nihcun minung nih kan hman mi holh in communicate a kan tuah. A kan cawnh biak. Dididada ti in a kan cawn bal lo. Cucaah Laimi holh theih lo hi hman dawh a si lo.

6. Holh theih lo hlasak timi hi Baibal ah a um bal lo. Baibal i a um lomi poh cu kanmah nih kan phuah chommi lawngte an si. Pathian nawl loin phuahchhomnak nawl kan ngei lo. Cucaah nan holh theih lo hi hla hna in nan sak caah nan holh theih lo hi hman dawh a si lo.

7. Holh theih lo timi biafang hi Paul nih a theihmi biafang a si lo. Rak si selaw Paul nih a ttialmi Greek Baibal ah a um el hnga. Paul nihcun “holh” ti lawng a ttial mi a si. “Theih lo” ti ai tel lo. “Theih lo” timi biafang cu an i leh palhmi Baibal lawngah a um i leh palhmi biafang cu Pathian thawchuah hnawhmi a si lo. Cucaah nan holh theih lo hi nan mah nih nan ser chommi a si i hman dawh a si lo. Ref: Dr. Aung Myint Thang

A tang hi Rev. Robert Thawng Zam nih holh theihlo kong a chimnak a si. A ngai duh mi caah video kan rak thil chih.