Holh Theih Lo A Dong Rih Lo: By Van Nun Lian

Sermon

Holh Theih Lo A Dong Rih Lo: By Van Nun Lian

Image result for van nun lian

”Dawtnak cu dongh a thiam lo. Profet an um maw? An rian cu a dih ko lai. Holh-theih-lo in a holhmi an um maw? Cu hna cu an dong lai. Hngalhnak kan ngeihmi zong a dih lai. A cheuchum lawnglawng a simi cu a tlingmi a phak tikah cun an loh phung a si ko” (1Korin 13:8,10). A cunglei Bible cherhchan in, Dr. Aung Myint Thang nih ”a tlingmi cu Bible cauk hi a si caah, profet, holh-theih-lo le hngalhnak cu an dong cang’ tiah video clip in a van chim i, a pommi zahzat le a pom lomi zahzat bak ai si.

A tlingmi cu Bible cauk hi a si taktak maw? Bialehnak a fawi bikmi cu, a tlingmi cu Bible cauk hi a si ti khawh a si i, a si lo ti khawh zong a si. A tlingmi cu Bible cauk hi a si thiam lonak ruang cu:

1) Bible cauk lawng hi a tlingmi a si lo. Jesuh Khrih zong a tlingmi si. Pathian dawtnak zong hi a tlingmi si. A fiangmi cu, a tlingmi tampi an um. Cucaah, 1Korin 13:10 nih ’a tlingmi’ tiah a sawhmi hi Bible lawnglawng hi a si lo.

2) Bible cauk lawng hi a tlingmi si ruangah, ”biaphun, vanholh le hngalhnak” tbk an dongh si ahcun, 1Korin 12:8-10 chungah a ummi Thiang Thlarau laksawng dangdang zong an dong viar ve ding a si ”fimnak bia, hngalhnak bia, zumhnak, mizaw damternak, khuaruahhar tuah khawhnak, fian khawhnak, holdtheih-lo holh khawhnak, holh-theih-lo leh khawhnak.

3) Bible cauk hi a tlingmi si sehlaw, zeibantuk Bible cauk dah a tlingmi cu si hnga? A.D. 397 in hmanmi Catholic Bible chungah cauk 73 a um (ca hlun 46 le ca thar 27). Kum 1534 in hmanmi Protestant Bible chungah cauk 66 a um (ca hlun 39 le ca thar 27). Jewish Bible (Tanakh/Tanach) chungah cauk 24 a um (tulio Protestant Bible ca hlun 39 khi a si ve). Cun, Orthodox le Oriental kohhran, tulio Jewish, Catholic le Protestant Bible hmanmi nakin an
Bible chungah cauk tam ngeimi an um rih.

A cunglei langhtermi hna hi zoh le ruah tikah, 1Korin 13:10 i, ’A tlingmi’ nih a sawhmi hi tulio zumtu nih kan hmanmi Bible cauk hi si dawh a si lo. Hi ’A Tlingmi’ nih a sawhmi hi Bible cauk a si lo caah, ’biaphun, hngalhnak le holh-theih-lo’ le Thiang Thlarau laksawng dangdang hna hi an dong rih lo. ’A tlingmi’ nihhin hmailei Jesuh Khrih pennak le taksa minung in thlarau minung kan i-thlen caan (Biathlam 11:3, 1Korin 15:50-54, 1Theselon 4:13-18) silole Dawtnak hi sawh sehlaw a dawh bik (1Korin 13:13, 1Johan 4:8).

Cucaah, holh-theih-lo cu Thiang Thlarau rianttuannak le cawlcanghnak he ai pehtlaimi a si ve caah, a dong rih lo (laksawng dangdang he). Zohchihmi: Tongues – Devilish or Divine? Irvin Baxter -Hvad er tungetale? Bodil Skjøtt -The Bible Canon – 73 books or 66 books? Ray
Sullivan

Note: Holh-theih-lo cu zeidah a si? Holh-theihlo cu: 1) Jesuh Khrih biaphun tlinnak hmelchunhnak a si (Mark 16:17), 2) Thiang Thlarau laksawng phun khat a si (1Korin 12:10), Pathian he chawnhlehnak le biaruahnak a si (1Korin 14:2)

Credit: Van Nun Lian

Leave a Reply