Hngakchia le Internet Ralrin Aherhnak! Ka theihmi hnih-khat tete khi, hrawmh ‘share’ awk a tthami poah cu, ka Fb hawile pawl hi ka thinlung in kan sia nan herh peng. Kan hnu deuh ahkhan caan pek tein nikhat chung internet safety kong ka va cawng.

Cu kan cawnmi chungah a tlaangtaar ‘topic’ pakhat cu Maivan Ttihnung ‘Internet Danger’ timi kong asi. Mah chungah cun a tam deuh cu hngakchia fa-le hna nih Maivan ‘Internet’ an tonghtham ning kongah ralrin a rak herhnak tete kong asi. “Internet” tihi Lai holh in “Maivan” ti-ah leh asi. A thei rih lomi kan um sual ah.

Kan theih bantukin tuchan fale hngakchia, a bikin ram ttha ummi nihcun Maivan tongh loin an um kho lo. Cun an tongh a herh caan zong a um ve hrimhrim. Asinain, Maivan a tonghtham zia an thiam lo i, duh poah in tonghter hna ahcun an nunzia rawknak le misual kut in thil ttihnung tiang zong an tong kho. Cucaah nu le pa asimi hna nih, fale hngakchia nih Maivan an tongh tikah kilven thiam a rak herh ngaingai. Atanglei ah tlawmpalte ka vun langhter:

1. Fale hngakchia kha an mah duh poah in Maivan tonghter lo ding. 2. Maivan tonghthamnak kongah fale kha sikaan ‘rule’ ttha tein ser piak a herh. An tongh caan rikhiah ‘limit’ tuah piak hrimhrim a herh. 3. Computer kha fale hngakchia an mah lawng ihnakkhaan ‘bedroom’ ah chiah piak lo ding.

4. Fale hngakchia nih Maivan an tongh tikah zeibantuk website dah an zoh; zeibantuk pawl dah an kawl, timi theih khawh a herh. Cucu na fa computer tonghmi “search history” or “hard drive” ah zoh law na theih khawh ko lai. 5. Na fa hngakchia nih Maivan a tonghnak Password le User ID na hal lai. Na theih ve a herh.

6. Fale hngakchia nih Maivan a tongh lio ah a pawng ah ruah lo piin na va kal i, a tongh cuahmah liomi ‘a zoh cuahmah liomi’ kha a phih/khar ‘close’ a tuah colh ahcun, cucu thil pakhat khat hmuh ter/zoh ter an duh lomi a um, tinak asi. Cucu red flag asi. Ttha tein na cawnpiak a herh cang, tinak asi. 7. Fale hngakchia nih a tonghmi computer kha zeibantuk software dah asi, ti zong theih khawh i zuam a herh. A dangdang tampi um len rih nain mah vial hi si rih ko sehlaw.

Credit: Salai Van D Ceu