LAI TLANG AH RAM CUH A LAR: 1. RAM THLO LE CHUN CUNG ZINHMUH THLANG AN I CUH

Zinghmuh Thlang cu Hakha Peng a va si ah, Falam Peng a va si ah apoinak a um lo. Cozah nih tuah an timhmi projet kha va tuah ko hna selaw Ram Thlo khuami ta zong a si lai i Chun Cung khuami ta zong a si ve ko lai. Chun Cung Ram chung i a um ahcun Falam leimi nan ra kho lai lo tinak asi lo. Falam Ram chung i a ummi ah chiah asi ahcun Hakha Peng lei mi nan ra kho lai lo tinak a si fawn lo. Nan buai ruang ca tu ah khan cozah project tu kha cancel a si i Falam Peng he Hakha Peng he kan cei veve.

2. COZAH LE HAKHA KEK HAKHA PAWNG KHUARAM AN I CUH

Kawlram cu cozah nih vawlei vialte hi keimah ta a si a ti. Phaisa i kan cawk bakmi innhmun hmanh khi kum 60 kan in hlanh hna ti a si. Pipu hna vawlei timi hi tlawmte cu a um ve. Asinain zeibantuk khi dah cozah nih pipu hna vawlei ah a ruahmi a si ti khi ruah ngai awk a um. Hakha kek kan unau pawl nih kan pipu hna vawlei an timi zong khi cozah nih pipu hna vawlei i a pom piak hna lo ahcun an cawl lenmi san a tlai te lai lo.

3. HMAWNG TLANG LE LEI TAK RAM AN I CUH

Hmawng Tlang le Lei Tak buainak cu Laimi dang vialte zong lungnuam lo dih in kan um. Laimi hi mi tlawmte lanwg kan si. Ai daw taktak ding kan si. Khrihfa lawngte kan si fawn. Jesuh nih nan ral va daw hna uh a ti. Chiat an serh tu kha thluachuah va pe hna uh a ti. Nan keh lei biang an i bengh hna ahcun nan orh lei vai chit uh a ti. Hmawng Tlang le Lei Tak cu unau kan si. Ral kan si lo. Cucaah Hmawng Thlang nih Khrih lungput in Lei Tak cu Modern Leitak khua sernak caah a herh zah in vawlei cu hman ter hna usih law, a ttha bik hnga. Nan cungah Jesuh ai lawm tuk lai i thluachuah nan hmu lai. Kei Hmawng Tlang e, kei Lei Tak e i ti chan a si ti lo. Jesuh ah pum khat kan si dih.

Tun Zaang peng mi hna cu Khampat kan Laimi hna nih ram an hal hna ahcun an pek thluahmah hna. Lo caah an hal, an peek hna, dum caah an hal hna, an peek hna. Electric mini-hydro caah an tiva an hal an peek hna. Din ti caah an hal hna, an tiva an peek hna. Kawl lei zong, Hmawbi khua ah Yangon pa nih lei a leh i Hmawbi khuami an buai lo hrimhrim. Tun Zaang khuate mi le Kawl khuate mi kan tluk ti rua hna lo.

Credit: Aung Myint Thang