Hluttaw ah ralkap 25% hloh lo cun pohmah 261 remhpiak cu cohlan khawh ding a si ve lo: Nihin Myanmar ram chung ramkheel thuk deuh in a bih mi hna nih an hmuh ning le zumh ning aa dang ngai. A bik in Tlangcung Miphun Party hna hmuh ning le NLD Party nih a hmuh ning cu aa dang taktak. Hi zawn ah hin ramkheel thuk deuh a bih kho deuh mi ram dawtnak taktak in ramkheel a bih i a tuah mi le thutden hmuhnak men in ramkheel a tuah mi Party le minung an lang pah thluahmah.

Myanmar ramkheel hi a phun te aa dang. Cucu hluttaw ah ralkap nih thutden 25% an chuah tak duh lo mi hi a si. Anmah ralkap le USDP zong nih Hluttaw ah thutden 25% hrawh duh lo buin Federal ramkawmh an aupi mi cu hngal na ruangmang mi hlen he bak aa khat. Federal taktak cu an duh ko ah ziah Hluttaw in thutden 25% hi an chuah taktak duh lo. Federal ramkawmh sernak ding ah Ralkap 25% hi kan herh mi a si maw? Hluttaw ah ralkap 25% loin Federal ramkawmh hi ser khawh a si lo maw?

Ralkap nih thutden 25% an lak mi hi copo in an lak mi a si lo. Thutden an duhnak men a si lo. Phunghram kha fawite in remh khawh lo ding in riantuan an duh caah hramhram in thutden an lak mi a si. Mipi an dawt hna le hmazah ahcun hramhram in thutden lak loin Election kal ning tal in kal hna sehlaw, mipi nih an thim hna ahcun ruah awk ngai a si ko. Hramhram in thutden an lak mi nih a langhter mi cu, ralkap nawl ngeihnak thumh an duh lo le federal ramkawmh ser an duh lo ti alanghter ko. Mah tein Chief Minister thim khawhnak phunghram pomah 261 vial remh duh tung iHluttaw in chuah vial an duh lo mi cu nawl ngaihnak pek loin min pek lawng a si. A min nak in nawl ngaihnak kha biapi deuh a si.

USDP nih hi pohmah 261 remh a duhnak zong hi purh dah pah khawh a si ko. Mipi thinlung a lak khawh ti lo, NLD a tei kho ding a si fawn lo caah Tlangcung mi hna sin ah hi Pohmah 261 hmang in ramkheel an rak tuah mi a si. Anmah nih Cozah ser hna sehlaw hi pohmah 261 cu a remh lai nain nawl ngaihnak a pe siang lai lo. Cucu hluttaw ah ralkap 25% hrawh lo ding an dirpi mi nih a langhter ko. Hi kong ah dohkalh tu Miphun Party nih Hluutaw ah ralkap 25% hrawh lo ahcun election hmanh hi nan duh ding a si lo. NLD nih Federal ramkawmh ser a duh le duh lo cu ralkap 25% hi hrawh siseh law a fiang ko lai.

Miphun Party nih Huttaw ah ralkap thutden 25% hrawh lo in Federal ser ding an aupi mi cu zumh awk a tha bak lo. Federal biafang in thutden hmuh aa zuam mi tu an si. Cucaah Chin Miphun nih kan hngalh awk asi mi cu, Hi Chief Minister mahte i thim khawh nakding phunghram pohmah 261 hi aa kan remh piak zong ah Hluttaw ah ralkap 25% hrawh an duh lo ahcun poh 261 cu cohlan ve ding a si lo. Hluttaw in ralkap 25% hrawh ding biapi ah chia tung lo in pohmah 261 remh ding hoih in ramkheel a tuah mi hna cu thutden duh nak men in ramkheel a tuah mi a si ti kha zumh lo awk bak an tha lo. Ref: The Voice Of Democracy