“Bawipa dawtnak a thar in tep tthan usih” Bawipa dawtmi hawidawt hna, kan Bawipa Jesuh kha Thawngttha chim in a vah lio le mi zaw a damter thluahmah lio, mithi a thawhter hna lio, cun a min a rak than tuk lioah cun zultu a thongthong in a ngei i Amah he i theih le i komh, ai pehtlaimi si kha an rak i cuh i an rak duh tuk. Sihmanhseh, vailam ah thah dingin an hun tleih i bia an hun ceih tikah cun a lei ah ttang in a hnu a zul peng tu hna le dawtu bik le ttanhtu bik bantukin a ummi a zultu hna le mipi vialte hna cu an tlau dih, ‘ka theih balmi a si lo’ an ti i an zaam taak dih ko. Kan Bawipa Jesuh tu nihcun mipi nih lung in cheh an timhmi misual nu kha a zaam taak lo i a khamh.

Minung nih Chiat-ni That-ni kan ton caan hi, a kan dawtu taktak le daw ngai bantukin a rak um i a rak kan leirawi ziartu an i hngalh/ fiannak caan a si i, cu caan te cu a deu le a tak theihnak fingrilh bantuk a si. Dawtmi an dawtu taktak ah na rak ruahmi kha na unau a si maw? Na hawikom a si maw? Na chungkhar a si maw? Nikhat khat ahcun zaamtaak tu le lawirawitu an si kho ko dahkaw, na herh tuk caan hmanh bawmh an duh lotu a si kho dah kaw ( a ton zong na ton cang ko lai) i ralrin awk le hrial awk zong a ttha lomi thil a si.

Thuk deuh le ttha deuh tein khin vun ruat tthan hmanh, Lung in thi lak cheh dingmi minu cu kan Bawipa nih a khamh bangin na chiat ni ah siseh na tthat ni ah siseh, na mual a pho cikcek caan ah siseh, bawmh na herh tuk caan ah siseh na pawngte ah a um i an daw zungzaltu le nangmah bawmh ding ah timhcia a si zungzaltu cu kan Bawipa Jesuh lawnglawng hi dahkaw a si cu ( Dawtu taktak cu Bawipa kan Pathian lawnglawng hi a si ko ti hi i fiang cikcek hna usih).

A hmun lomi lei ahhin a hmun lomi leimi nih cun in zaam taak ko hna seh, zungzal a hmunmi Van Siangpahrang fa dawt na si/ kan si. Bawipa nih a reltu cungah a dawtnak a thar in pemh nun in ngeihter ko hna seh. God bless you. Credit: Bawi Thiang Bik