“Thluachuah hi kilven thiam usih” Voikhat cu siangin kan rak kai lio ahhin Police bawngbi rawng asimi bawngbi (tawhrolh) ai dawh ngaimi te pakhat khi ka rak ngei, cu ka bawngbi cu Mizo ka hawikom ttha ngaimi pa pakhat nih hin a uar tuk i tthenh/ pek dingin a rak ka hal peng, ka duh tukmi ka uar tukmi a si ko nain ka hawipa nih a uar a duh lawng siloin a herh tuk i asi ko hih ka ti i lunglawm tein ka rak tthenh/pek.

Zarh hnih hnu ah ka hawipa Room ahcun kan hawikom rual bianuamsai in kan tthu hna, cu a Room chung i kan tthut lioah ka hmuhmi thil nih ka ngeih a ka chiatter ngai. Duh le uar tuk le herh tuk in a rak ka halmi bawngbi cu kuthnawm hnawhnak ah a rak i cang diam ai… Lentecelhnak hna ah a hman i rianttuannak hna ah a hman caah a ttha ngaimi bawngbi cu zarh hnih hnu ahcun kuthnawm hnawhnak ah a cang ko. A rak petu kei ka caah santlai tilo sihmanhseh, kai ceih len awk zong a si ti lo nain ka lungchung cun ngeihchiatnak in ka khat.

Kan Bawipa Jesuh zong kha vawlei ah kum 33 hrawng te a um chung ah sermi thil a dawt hna i, zultu hna hmanh kha rian ttha taktak in a phawt cio hna, Management tuah a thiam i zultu hna kha rian a thiah cio hna. Kan Bible Genesis 1 nak chung kan zoh tik zongah “Pathian nih a sermi thil a zoh tik ah a lung a si ngaingai” a ti. Kan Pathian hmanh nih a sermi thil ah a lung a tling i a sermi cungah dawtnak a ngei i zeizong thil kha rem tthiptthep tein a chiah hna.

Nihin zumtu a fa le hna nih hin kan Bawipa sin in kan hmuhmi thluachuah sunglawi hna hi kan daw maw? kan kilveng maw? Kan sunlawih maw? man kan ngeihter maw? timi hi a thar in ruat cio tthan hna usih. Sermi thil dawt lo le man ngeihter lo hi a Sertu dawt lo le zeirello pakhat a si ti zong hi i fiang hna usih.

Bawipa zaangfahnak thawngin a rum he sifaak he Car, Bike, Cycle, Phone, Laptop, inn le lo, hmun le hma, khua le ram tbk… thluachuah kan dong cio hna, hi bantukin Bawipa thluachuah kan donmi hna hi daw lo in na daithlanh sual maw? a rawh lai le a tteh lai ruat loin na duhpoh in na hmang sual maw? An petu thinlung khi thuk deuh in ruat hmanh, a thluachuah hi daw lo le man ngeihter lo cun na um ka zum lo. Thil hme tete tiah kan ruahmi hna zong khi Bawipa thawngin kan hmuhmi thluachuah dahkaw an si cu.

A thluachuah kan donmi cio hi a tthatnak in hmanzia thiam cio hna usihlaw, daw hna usih, man ngeihter hna usih, thluachuah petu Pathian sinah lawmh bia chim hna usih. A thluachuah kan hman cuahmah pah khin lawmh bia chim philh hrimhrim hlah usih.. A reltu Bawipa nih thluachuah in pe cio ko hna seh. Kai lawm tuk. Bawi Thiang Bik