Kalay peng, Zonuam khua ah a pu nih a tunu kum 17 tleirawl nute tlaihhrem a timh caah a tunu nih hreitlung in a pu cu a lu ah voi 7 a tuk i a thah Cirhti nih a tarlangh. Thil sining cu March 29 zan ah Zonuam khuami Ngun Siang Mang (kum 37) nih a unu fanu kum (17) tleirawl nute cu hreitlung aa kengmi a pu nih sualpi a timh i a hro. Cutikah tleirawl nute nih a pu cu a nam i a pu kennmi hreitlung cun a pu Ngun Siang Mang cu a lu ah voi 7 a tuk i a thi tiah theih a si.

Hi kongah palik sin holhlet piak tu le Ngun Siang Mang ruak phurtu Zonuam khuami Za Kam Lo nih a chimmi cu “Ngun Siang Mang hi nizan March 29, chun suimilam 12 hlan ah khan a thi cang. Tu chun palik pawl sinah minu nih a chimmi cu ‘cu hlan zongah tlaihhrem a ka timh bal cang i a ka namnek tuk caah ka tuar kho ti lo. A pu nih le zu a ri peng. Nizan ah tlaihhrem a ka timh than i ka duh lo caah a bengh zong a ka bengh, hreitlung in a ka tuk lai bantukin a um caah ka nam, a hreitlung ka chuh i ka tuk. Kalay siizung ah siibawi pawl nih mithi ruak cu an chek i a lu ah hreitlung tuknak hliamhma hmun 7 a um an ti. Ka tuar khawh ti lo caah ka thatmi a si’ a ti. Cuti cun a mah le mah thonginn ah a rak i up” tiah a chim.

Za Kam Lo nih a chim rih mi cu, “Ngun Siang Mang hi a hlan ah Mizoram nu he an i ngeih bal i a tu hi HIV zawtnak a ngeimi si. Tu hi Kalaymyo i nubuu pawl sin ah report tial kan timh. Atu thil cang hi tlaihhrem a timh caah a nunnak aa runvennak in a thahmi a si i Nubuu pawl nih an kan bawmh lai i a chuak colh lai ti zong ka zumh. Motor chung ka thutnak pawngah Ngun Siang Mang pa a thu ve i na fapa na dirpi lai maw tiah bia ka hal tikah ‘a sual man a tuarmi a si ko’ a ka ti” tiah a chim chih.

Cu kong cu Zonuam khua okesuh bawi nih Letpanchaung palik sinah an chim hnu in a kong an hlat hnu lawng ah an theihmi a si. Kalay myone police station in tuanvo ngeitu pakhat nih “A pate hi HIV sii a ei liomi a si. Ahlan zong ah tlaihhrem a rak timh bal cang. Tleirawl nute zong siizung ah HIV sii an eiter lio a si i zawtnak a ngei le ngeilo cu theih a si rih lo. Hi hnu thlathum ah a thi an chek than lai. Tleirawl nute hi mithattu a si tikah criminal code 302 in court ah chuahpi a si” tiah a chim.

Mithi ruak cu siizung in an khua ah an kalpi i an vui colh cang tiah theih a si. Kum 17 tleirawl nute hi a pa-ei he khuasatimi a si i an inn te ah thiamtah tawnmi a si tiah theih a si. Ref: Cirhti