LAIMI THLARAU LEI NAN TLAUNAK ARUANG

Laimi Pathian biatak nan hngalh khawh lo ning, Pathian duhning i Pathian nan biak khawh lo ning, Pathian thangtthat hmanh nan thiam lo ning, nan tlau le tlau lo hmanh nan i hngalh lo ning, biatak le thilhman nan char khawh lomi hi araung a um. Pathian biatak hmanh doh thlawrh i nan dohmi hi aruang a um. Araung tampi lakah pakhat cu Baibal caan tthen ning na theih lo caah a si. Baibal caan nan tthen thiam lo caah a si. Atawinak in ka ttialmi hi van zoh hmanh uh!

1. SUAL LO LIO CAAN (Period of Innocence): Minung sual i an rak tluk hlan caan kha a si. Pumh a rak um lo. Sual chir a rak um lo. Phungchim a rak um lo. Raithawi a rak um lo. Pathian he a komh in i komh top kha a rak si.

2. HNGALHNAK CAAN (Perid of Conscience)

Minung sualnak chung i an tluuk i Pathian nih thimmi miphun a ngeih hn caan karlak kha a si. Raithawinak a rak um. Raithawi piaktu tangbawi an rak um lo. Mahtein rai i thawi a rak si. Cawnpiaktu sya an rak um lo. Pumhkhawmh a rak um lo.

3. BIAKAM CAAN (Period of Covenant)

Pathian nih thimmi miphun a ngeih caan in nawlbia peek an si tiang kha a si. Pathian nih unconditional cavenant a rak tuah. Cucu an tuahsernak ruangah si loin Pathian nih a duhmi bia poh a rak kamh hna. Raithawi cu a um ve nain, cuarpar tan kha Pathian biaknak ah ai chap. Inchungkar lu bik poh kha, biaknak lei hrauitu le thuachuahpe khotu ah an i cang. Eg. Isak nih Jacob thluachuah a peek i pathian nih Jacob thluachuah a peek ve.

4. NAWBIA CAAN (Period of the Law)

Mose Nawlbia peek an si in Thiang Thlarau a tttum tiang kha a si. Sualnak caah saram thisen in raithawi a herh. Tlangbawi nih rai thawi piak a hau cang. Mahtein rai i thawi khawh a si lo. Cupinah Moses peekmi nawlbia kha zulh fial a rak si.

5. ZANGFAHNAK CAAN, KHRIFABU CAAN (Grace Period, Church Period)

Thiang Thlarau a ttum in rapture, thianglawr, tiang khi a si. Atu kanmah kan caan hi a si. Nawlbia zulhnak in khamhnak hmuh khawh a si ti lo. Saram thisen raithawinakin Pathian he remnak ser khawh a si ti lo. Tlawngbai kan ngei ti lo. Jesuh nih a tuah ciami khamhnak kha zumhnak in cohlan i khamhnak hmuh a si cang. A zummi poh chinchiahnak caah le bawmtu caah Thiang Thlarau pumpaakcio kha peek kan si cang. Biakin ah i pumh a si cang. Pastor, Elder le hruaitu dangdang kan vun ngei cang. Asinain, zultu hna chan le kan chan i ai lawh lo nak a um fawn. cucu nan tthen thiam lomi cu a si bik.

(a) Zultu hna chan lio ahcun Pathian nih aw, vanmi le larnak hmangin kha lio zumtu hna sinah a rak i phuang rih. Cucaah Pathian nih Thlarau lei thil kha special in hngalhnak a rak peek hna. Zumtu tthami nih an rak ttialmi cakuat kha Pathian nih thaw a chuah hnawh i baibal ah ai cang.

(b) Zultu hna chan a dih hnu cun Pathian nih ai phuannak a maak. Minung hna sin i ka chimmi le ka cawnpiakmi hna hi Khrihfabu ngandamnak caah a zaa cang a ti. Cucaah hngalhnak a dong, prophet a dong, holh dang in chimphuan khawhnak a dong. Bibal ca ttial khawhnak a dong. Mi tampi nih larnak kan hmu ve an ti nain Baibal he ai ralchanmi a tam ngaingai tawn. Billy Graham zong nih cauk tampi a ttial nain Baibal ah ai cang kho ti lo. Zultu hna sin i Pathian ai phuannak chimrel chin i Jesuh zumhter kha a kan fial mi a si.

6. HARSATNAK CAAN (Period of Tribulation)

Thing Lawr hnu in Jesuh voi hnih nak a rat tiang a si. Biathlam 6 in 19 tiang vialte khi khi caan i a tlung dingmi lawngte an si. Thlacam a dong lai. Mission a dong lai. Zumhnak in zaangfahnak in khamhnak a dong lai. Church i a rianttuanmi vialte hi an dong dih lai.

7. KUM 1000 PENNAK CAAN (Period of Millenium)

Biaphaun 20 khi a si. Jesuh a rat hnu in kum 1000 chung a si lai. Jesuh nih dinnak le daihnak in a uk lai. Siangpahranga si lai. Vawlei ah Sehtan a um ti lai lo. Tuforh a um ti lai lo. Sualnak a um ti lai lo. Pastor an um ti lai lo. Jesuh cu kan pastor, kan tukhal le kan siangpahrang a kan uktu a si lai.

A tawinak in kan chimh hna bia. Hihi nan theih lo caah Baibal i a ummi vialte nan cawh dih i nan tlaunak chan cu a si. Nan zumhnak hi phungki rawl a lo. Phungki cu inn kip i rawl a khawlmi an si caah an rawl cu meh phunzakip ai cawh dih. Na zumhnak hi nawlbia le zaangfahnak le zultu hna caan le atu kan caan vialte na cawh dih ve. An tuahmi theology hi “Phungki Rawl Theology” a si.

Credit: Dr. Aung Myint Thang