Hi Tining Kan Si Ahcun Indianapolis Um Laimi Hi Mah Hnu Kum 10 Kan Dam Ti Lai Lo

Chin News

Ramthumnak Ah Chin Miphun Hi Huat Kan Tlai Chin Lengmang Cang, Cucu Zeitindah Kan Dam Than Lai

Related image

(Minutes 30 hlan ah tialthlu ka hauh caah arannak tukin ka tial i ka duhning in ka tial manh lo, cun cafangkomh zong ka palh ngai lai ka ruathiam hram u. Cun tutan cu zeidang photo si loin keimah photo ka vun tar) Chin miphun hi ramthumnak ah nikhat hnu nikhat in huat kan tlai chin lengmang, kan fale chan tik lawngah an rak i nuam te lai.

Chin miphun hi, khuatefa, sianginn kai lo, pawngkam (ram ngeitu) pawl nun ning ngiatzia thiam lo, mi tihzah le upat thiam lo, keimahca atha ah cun aza timi le hmurka thlum biachim a thiam lo taktak mi kan si nak nih hin a kan chiatchuah taktak. USA ram companies pawl ah hin Chinmi kan tamnak hmun paoh cu zeitikhman ah a nuam bal lo. Holh kan thiamlo lung in, rian an kan chuahlai ti thin phang lung in le keimah hi supervisor nih ka daw bik seh, ti lungput in nifatin tha dihlak chuah in company (warehouse) ah kan tuan i, pawngkam mi caah harnak phunkhat kan vun siam colh.

Laimi cu holh kan thiam lo lung in pawngkam miphun kan komh khawh hna lo cu va um ko rih seh, lenglang zohnak hrimhrim in kan umnak ram nunphung kan i lak duh lo zia a lang i, kan nunphung le kan tanhtuk zia kan langhtuk mi nih kan pawngkam miphun thin a phanter bik in ka hmu. Miram ah kan um kan ti le America cu freedom ram asi kan ti riangmang i kanmah siarem ning bakin khua kan sa.

Kan hnu, kan hmai, kan ser le kan cung zoh ti loin keimah innchung ka lut cang ko tiphun hna in luh le cangka innka thlah colh i kan hnu pa cal khakter. Keimah le kapaw te, ti riangmang i behrumthu hna thu taktak in microwave ah lum, arsa ruh ko pei thaw cu tiin zapi hmai ah hani hlik lengmang tam, ti bantuk midang caah fahnak, rimchia le fihnung asi maw ti zohzia zong hi kan thiam kho hrimhrim rih lo.

America ah hin kum 5 ka um ve cang i, catialmi pakhat ka si ve tikah thil sining hi ka ngiat taktak ve. Minak le Spanish nih Mirang an rak tihning hi nikhat hnu nikhat in kaifiang chin lengmang. Kanmah Laimi tu nih cun zeite ah kan rel lo tuk fawn hna, hi ko hi tih nung phunkhat asi. Laimi kan upa te hi bawi va kat le an taw va zat cu kan thiam taktak. An bawi le or ramuktu kan lem khawh hna ah cun aza ti phun in kan um, taktak ti ah cun pawngkam mi he rualrem tein um khawh ko ah cun bawi va kat hi a hau lomi asi.

Zuurit buin siizung ah hmape he thluthluk in thutdan cungah it kan hmang, rimchia taktak in zeipoi lo taktak in kan kal. Voikhat cu nu pakhat siizung ah ka kalpi, kal lai ah rawl a ei i zawngtah cu ceinawn in a chei i, nurse nu nih ra rih a ka ti “hi nu hi a ha ai tawl bal lo maw a ka rim athu tuk” a ti le ka chim ngam ti lo, a ningzak tuk sual lai ka ti i.

Kan pawngkam ah zeidah aum, khuazei ram ah dah kan um, zeibantuk a uar mi miphun dah an si i, zeibantuk phunglam dah a zulmi an si timi hi philh hna hlah usih. Biakinn hi Pathian thangthatnak lawngah hmang hna hlah usih, Mirang nih nikhat hnu nikhat in an kan huat chin lengmang nak kong pawl zong hi zeitindah kan phisin lai timi zong hi kan Saya te nih an kan ruahpi a phu tuk cang.

Hi ti ning tein Indianapolis ah Chin miphun kum 10 kan kal ko rih a si ah cun, Mirang Nationalism, Extremist le KKK pawl hi an hungchuak lai lo tiah ahodah chim kho lai? Kan upa te nih bawi pawl an kawmnak le an katnak hin kan him naisai lai lo, pawngkam mi he rualrem tein umzia kan thiam lawnglawng ah kan him lai i kan dam lai. Mirang nih hin riantuan thawn ngang i mithmai pang lemlo nakin thathut ngai ko zongah mirh simsiam tein um khawh peng i mizei he paoh ai kom kho mi si hi an uar bik tikha philh hna hlah usih.

Hi tining tein cun Indianapolis cu hi hnu kum 10 kan dam ti lai lo, miphun karlak ah buaibainak fak a chuak hrimhrim te lai.

Credit:Chelsea Bawi

Note: Mah ca hi a sau pah cangmi si ko nain theihtlei phunkhat bantuk le hmailei lungfimnak dingah rak taar tthanmi a si.

Leave a Reply