Ram le miphun caah a nunnak a pemi Mya Thwe Thwe Khine (Kum 19) a thi taktak cang! February 9 Naypidaw ah palik pa nih a lu ah meithal in a kahmi Kawlnu te cu nihin ah a thi taktak cang. Tuan ah siibawi te nih a thluak rian a tuan ti lo an ti i oxygen an pek.

Feb. 15 ah zeihmanh ruahchannak um ti lo nan duh cun oxygen cu kan lak lai i nan naunu hi a thi cang ko lai tiah siibawi te nih chungkhar lei cu an chawnh hna. A sinain chikhat cu chungkhar lei nih an duh ve lo. A sining an zoh tikah aa temtuk i la ko cang uh an ti hna. Cu ti cun oxygen an thleihmi cu an lak piak i minu te cu nihin Feb. 19 zing 11:05 ah a nunnak a liam.

Siibawi te nih a pum hlai i tha tein zohfel an duh caah a ruak cu inn tin pi colh lo in check hlainak ah an kalpi ti si. Tha tein record chiah an timh. Vawlei tuanbia pakhat ah a cang. Ram le miphun caah a nun a pek. Amah kawl nute hi kum 19 lawng si rih. Naypyidaw University ah commuter cawng lio si. Ref: T.C.T

Relchih: Ralkap cawlcangh ning le mipi cungah thahrum an thawh ning ruah ahcun thinphang in ngaihchia taktak si sang. Ralkap nih February nikhat 2021 i uknak an lak hnu in nihin tiang mipi cung zohchia ngaiin an tuahsernak zoh tikah a tlawm ti lo. Ralkap nih uknak an lakmi duh lo ruangah nihin tiangah mipi nih duhlonak langhter peng a si. Cu tikah ah ralkap cawlcanghnak zong nikhat hnu nikhat in an cawlcangh a chia chin lengmang cang. Nihin ralkap tuahsernak theih tikah ngaihchia taktak khi si ko.

A cunglei kong he pehtlaiin Myanmar rampi cu ralkap nih uknak lak a si tikah mah le umnak state cio ah ralkap uknak kan duh lo tiin duhlonak langhter cio a si. “Nihin zongah Kachin ram Mitkyina Sayamah pahnih cu duhlonak langhter ruangah ralkap nih faak ngaiin an velh-hrem ruang hna ah pakhat cu a kutruh an khiah” tiah theih a si. Source: Mitkyina News Journal