Hi Thawngpang Theih Cu A Nuam Lo Ngaingai China Ram Ah Chinmi Minung 8 Palik Nih An Tlaih Hna Zaangfak Taktak An Si A Poi Kho Taktak

China ram ah an rianttuanak Company aa remcan ti lo ruangah cu an rianttuannak Company cu chuah taak in rianttuan ding an kawl lio ah chinmi minung 8 cu china palik nih August 23 zaanlei suimilam 4: 30 hrawngah an tlaih hna tiah theih asi.

Chinmi China ram ah tlaih a tongmi hna cu, Lungrang khua mi Van Nei Mawi, Joseph, Cung Khaw Lian, Van Nei Thang le Englian, Rialti khua mi Lal Sui Hnin @ Kyawng Mya Too, Tin Htun Lyn, Thlanrawn khua mi Jonathan hi hna hi an tlaihmi hna cu an si.

Thil a can ning cu, Kawlram in China ram ah rianttuan dingin minung 60 hrawng cu Chinmi Agent ttuanmi nupa hna hruainak in China ram Muping cu 2019 January 20 ah an rak phan. Cuticun Company ahcun rian an ttuan hna i, an company ah rianttuan ding aa remcan ti lo ruangah thlaruk chung an um hnuah an rianttuannak Company cu an chuah taak hna.

China ram ah rianttuan dingin a hruaitu Agent hna nupa zong nih zawnruahnk le tuaktaak piak loin an um ruangah China ram ahcun vahvai hram an i thok. Zei can remrua dah lamkam ah riak in anmah ei le din hmanh ah lungreithei vansang in an um i, rian cu heh tiah an kawl peng. Cuticun rianttuan dingin kawl in August 22 zaanlei Suimilam 6:00 hrwngah Fuijin lei panh in an kal i, rianttuan ding an kawl cuahmah lio ah cun August 23 zaanlei suimilam 4: 30 hrawngah China palik pawl nih cun an tlaih hna.

China ram i an rianttuan hawi pakhat nih cun, ” zaanlei suimilam 4: 30 in kan i chawn hna i, atu hi palik nih an ka tlaih i, motor chungah kan um tiah a kan ti. Suimilam 6;00 ah ka chawnh tthan hna tikah cun chawnh khawh an si ti lo” tiah a chim.

Rianttuan ding kawl in Fuijin lei panh in a kal lio ah an zapi lungtlinnak in mi pakhat Facebook hmang cun China ram a ummi an hawi le an chawnhnak innpi ah cakuat zong an chiah ta. Cu cakuat an chiahmi a ttialmi cu” Hawikom dawt hna thlacam bawmhhal kan in duh hna, tuni tiang kan remcan lo ruangah kan pa 8 in tuzaan suimilam 6:00 hrawngah Fuijin lei panh in kan kal lai.

An kan dawtu u le nau hna kan i remcan khawhnak ding le rian kan hmuhnak dingah le dam tein kan i ton khawh tthan nak hnga dingah Pathian sinah thlacamnak in kan bawm ve rih ulaw tuni tiang lam an kan hruaitu Pathian sinah lunglawmhnak kan chim pi ve uh tiah bawmh kan in hal hna, kan i lawm tuk” tiah August 22 zaan ah an hawikom dang sinah ca an kuat hna.

Note: Hihi a poi taktak mi thil asi. Puaisa pawl hi kanmah Chinmi lila kan si tawn. Naite zongah Puaisa nupa pahnih nih an nau le fak ngaiin an hremhna an hlen hnanak kong zong kan rak thanh cang bal khah. Thonginn um bantuk in kan um zeihmanh kan tuah kho lo lengchuah zong an duh lo ei din cawk ding zongin an kan kal ter duh lo. Kan Hmatphungttin tiang an ka lak piak chuh dih tiang harsatnak a tongmi nih an chimmi rak thlah bal cang. A poi tuk hringhran thlacamnak in bawm cio hna usih!