Halkha Khuahlun Pu Thawng Ir Cu Laimi Pa 3 Nih Mawṭaw In An Rial I An Zaam Tak

Chin News

Hniang 15 ah zaanlei sumilam 6:30Pm hrawngah Halkha khuahlun Pu Thawng Ir cu amah inn pawngah Mawṭaw aitapmi i cu hna nih bawmh an hal i a bawmhnak hna ah mawṭaw nih a rial i a bawmhmi mawṭaw mawngtu pawl nih an zaam tak tiah kan theih. Cu Thawng Ir cu Halkhua hlun a si a i amah hi kum 63 a si tiah kan theih fawn.

Tutan ah a cangmi kong he pehtlai in amah Pu Thawng Ir nih The Hakha Post sinah a tanglei bantukin a chim. Pu Thawng Ir nih a chimmi cu,“Nizaan thil ka tonmi hi ka hmaika i mawttaw aitapmi ko mi ka bawm uh tiah an ti ko mi bawmh lo cu ka nunnak hrimhrim nih a duh bal lomi a si.

Cucaah tlawmngai, teimak emem in ka von bawmh tikah kan til le kan til khawh lo tikah a mawttaw hi a silpaleng pi in a um tikah Don ka naupa nih thilfung rak la ulaw a vawlei hi ka chunh lai i a mawṭaw ke a tla ko lai a ti. Asinain mawttaw mawngtu (a bawmhtu) pakhat nih a hau lo, hnulei kirter (nohsoah) law a ke cu a tla ko lai tiah a ti i a tla taktak ko.

Bialo si ne lai hi teh ka ti i mawṭaw lam in aihlatnak pe 20/30 hrawng a si lai lam sil leiah mi inn tual ah ka zaam. Mawṭaw lam leiah tawlh ti loin le hnu zong tawlh ti loin keimah leiah a von kuaih ter i mawṭaw lam a awrmi zong si lomi, lankuai awr (lampi te) ah ka tla. Mawṭaw mawngtu hi minung pathum an si i an mawttaw cu a raangmi a si.

“Ka fale nih an ka zuanhnawh i, mawttaw mawngtu pa zong nih a von ka bih ve. Asinain a mawttaw thil a char i mawttaw cungah a kai sizung leiah an ka kalpi rua lai ka ti i lo diam an ka zaam taak. Mawṭaw mawngtu pakhat hi kum 20 cung cu a si cang lai. A dang pahnih hi cu kum 20 hrawngah an si lai ,” tiah Pu Thawng Ir nih a chim.

Pu Thawng Ir cu sizung ah kalpi a si i tuni ah sizung in a chuak cang tiah kan theih. A tawi fiannak in kan langhtermi a si caah a chimmi kan rak langhter dih lo. Video kan chiah chih i video ah tlamtling tein ngaih khawh a si. Charhchan: The Hakha Post VIDEO

By Salai Lungthli Tum|CNLD party nih Pu Reubin report an tuah caah an buai ngai|Pu Reubin(Zokhua) hi CNLD a chuah tak i Pu Lal Maung Cung hruaimi CNP party in thimnak luh aa tim, nain CNLD nih chuahnak ca an pek duh lo. A hal lengmang hna nain an pek duh lo caah party chuahnak ca tel loin Election Commission zung ah form a ap.

Tuni kha candidate pawl fehternak biahal a si. CNLD phu nih Pu Reubin cu ‘party in chuahnak nawl kan pekmi a si lo, MP aa cuh kho lo’ tiah commission zung ah report an tuah. Tutiang ah cun commission nih biachahnak an tuah rih lo, Pu Reubin cu lungrawk ko.

‘CNLD party ka chuah tak tiah ca ka chiah i an cohlannak ca pek ding ah ka hal lengmang ko hna, an ka pek duh lo. Atu ah anmah lila nih party chuahnak ca a ngei lo tiah an ka report than cu a poi taktak’ tiah Pu Reubin nih a chim.

CNLD an lungput hi khuaruahhar ngai cu a si ko. Report an duh ruang ah chuahnak ca an pek duh lo kha a si. Kawl bawi uknak kan doh an ti nain anmah lehlam hi Kawl bawi biachahnak aa bochan bikmi an si.

Pasal taktak le vakok lungput a ngeimi nih cun a thurhnawmmi tuahsernak in tei i tim ding a si lo, mipi vote in tei i tim ding a si. Report tuah in midang thlak timh cu ralchia sanghrang lungput a si, nan party logo i vakok kha phoih than ulaw zoh nan i dawh deuh hnga.

Leave a Reply