Hakha shopping mall cu tihnung thlankhur si lo, minung za pawcawmtu ding a si. Ralhmung cerhmun ah shopping mall an sak lai’ timi thawngpang ka theih ah ka rak i lawmh ngai, ‘Hakha nih kan herh bikmi pei kan sang ah an rak chiah cang lai cu’ ka ti. Ralhmung cerhmun cu a kaupi caah parking hmun ai rem i khua lai a si fawn caah Hakha a dawhter tuk te lai tiah ka rak ruah, a buaibaimi an um lai ka rak ruat hraw lo.

Nain, tlawmpal ah cheukhat nih cun ‘shopping mall(dawr nganpi)’ kha IS ralhrang bantuk in an hun tih, shopping mall nih a kan thah dih lai ti bang thih ngamh in cozah cu an soisel i an doh. Lamzawh tiang an i tim cang ti a si. An i manh ngai. Hakha nih bawlung cerhmun 6 leng kan ngei, nain sipuazi lei thanchonak caah a herh tukmi shopping mall belte kan ngei rih lo. Kan herh ngaimi shopping mall pakhat caah kan cerhmun pakhat pekchanh cu a tha ngaimi investment a si ko tiah ka ruah.

Tulio Hakha dirhmun in khua leng ah shopping mall tuah awk a tha lo, a kal duhmi an tlawm lai. Hi ruang ah Ralhmung cerhmun thengte an i thimnak a si lai tiah ka ruah. Cerhmun cu kan herh zat in khua leng zong ah tuah khawh a si, bawlung chuih duhmi nih cun GTI le CCU kun zong ah an kal hnawh cio ko, bawlung kun kan harsa lo.

Thil tha tuah tikah 100% a tha dih timi a um bal lo, side-effects(that lonak chuahpimi) a um lengmang. Damnak sii tlang khat din hmanh ah side-effects cu a um. Shopping mall zong that lonak a chuahpimi a um ve ko lai, nain thatnak a chuahpi ding le chiatnak a chuahpi ding cuaithlai tikah thatnak a chuahpi ding a tam deuh tuk tiah kei nih cun ka ruah.

A tawinak in chim ahcun Hakha mino a thong deng in riantha a kan pe khotu ding a si, bawlung kun belte nih cun phaisa a chuahpi lai lo hlei ah mino riantha a kan pe lai lo, bawlung thiammi le lentecelh duh caah cun hmun tha tuk a si ko nain. Salai Lungthli Tum