Hakha Le Falam Ummi Kan I Ralrin Ngaingai Aherh Ko Zawt A Fawite Hih
Hakha khuasik cu a zual chin lengmang ko rua a luancia December thla nak in a kik deuh cang ti a si. Nihin zing tiang ah khuasak ning hi -5.0°C tiang a phan cang tiah Chin ramkulh khuacaan zung lei nih an langhter ning a si.
Tukum cu a kik ngai ko nain kan hnukum February thla bantuk tluk cu a phan rih lo ti asi. A luancia kum 2018 February Ni 3 ah khan -6.0°C a rak phan bal ti a si. Laitlang ahcun Hakha hi a kik bik ti a si peng taktak ko nain -6.0°C tiang a phak hi cu a um lo tluk a rak si. A tu ahcun -5.0°C tiang a phak tikah a kik taktak rih tinak a si.
Hi kong he pehtlai in Chin ramkulh khuacaan zung lei ttuanvo ngeitu a simi U Khup Kan Cin nih ” Hakha cu December le January ah hin khuasik ning a zual ngai. Nihin zing hrim cu dinti kan chiahnak Bel le Umm chung ah a um mi ti tiang in a khal dih. Zing suimilam 11am tiang zong ah a kik ngai ngai rih. Inn chung ah kan chiah mi tii tiang in a khal dih ko i dangkhar bantuk ah a cang dih. Kan nih kan umnak sang hi cu niceu kan hmu nain khuapi chung cheukhat ahcun niceu hmanh a chuah lonak a um kho i zeitluk in dik a hei kih hnga” tiah a chim.
Hakha hi Chin ramkulh ahcun a kik nak bik a si tawn. A luancia kum 2011 December ah khan -5.0°C a rak phan bal, cun kum 1998 December ni 30 lio ah khan -6.0°C a rak phan bal cang tiah theih asi. Hakha lawng si loin Falam peng hmun cheukhat zong a kih tuk ah hin thlaihnah zong an an khal dih i Laimual khua zongah ti an khal dih. Ahmanthlak zong kan chiah chih i nan hmuh ko lai a kih taktak ti a fiang. Ti lawng hmanh si loin thlaihnah hmanh a khalmi hi cu ralrin ngaingai kan herh. Credit: laikokekjournal
Note: Hihi laikokekjournal ta kan lakchinmi a si i anmah siannak in kan lakmi a si caah laikokekjournal siannak tel loin Copy-paste kan tuahpiak hram hlah uh!