Hakha Khualipi Ah Kan I Cawn Awk Asi Ve Ko Rua: Hakha A Um Kho Lai Ti Na Ruat Maw Hihi Rak Zoh Ve Law

Hakha Khualipi ah Kan I Cawn awk A si ve Ko rua

Thiltha a simi le mipi caah a thami cu kan i cawn awk a si ko. Kan i cawn awk a si kan ti tikah kan thazang le kan sining nih a tuah khawhmi thil a si ahcun a tha chin chin. A tuah khawh lomi a si zong ah kan i hnek ahcun kan tuah khawh ding a si ahcun kan i hnek ding zong a si ko. Kum sau nawn a rau ding a si ahcun kum sau nawn a rauh hnu ah i cawn ve ding in kan i timh tuah ding a si ve ko.

Vawlei rampi hi kan rak i thlau tuk hringhran ti cu al awk a um lomi thil a si ko. Kan vawlei pi cu aa thleng lo nain kan minung le kan ram sining duhsah tein aa thleng lengmang ve lai. Duhsah tein kan ram zong a hung thangcho deuh chin lengmang te ko lai. Thil kan hman bal lomi le kan rak theih bal lomi zong kan mit nih a hmuh lai piin ah kanmah zong nih kan hei hmang lengmang te ko hna lai.

Hakha khualipi zong khua te um tampi nih kan hei panh chin lengmang te lai. Khualtlong mileng an rak tam chin lengmang ko lai. Khuachung ah a vakmi hna dinhnak hmun ti bantuk tete zong amah le chan le minung hoih in a rak um vete ko lai. Atu zong ah Hakha khualipi dihlak a langh dihnak hmun “Hakha View” ah nungak tlangval, upa ngakchia, khualtlawng mileng vialte heh tiah an va kal. Hakha khualipi aa dawh ning an zohnak hmun tha, hmun nuam pi a si.

Asi kun ahcun kan i cawn awk cu zeidah a si kun???

Hakha cu kan khualipi a si caah khualtlawng mileng an tam chinchin lai. Telephone chan, internet chan asi cang caah phone tongh lo in a tlam a tling ti lai lo. Cucaah an tlunkalnak ah an phone battery a dongh caan he aa tong caan a um te lai. Cucaah Hakha View ah siseh, Hakha khua laifang pakhat khat ah Phone Battery rawnnak hmun te um kho sehlaw a tha tuk hnga! Norway ram Oslo khua, mitampi tlunkalnak ahcun zeitindah an tuah ning cang a si? Norway ram Oslo khua ah an tuahmi cu atanglei hmanthlak ah rak zoh ko kun uh. A tha tuk hringhran. Ram thangcho cia ciammam! Caredit:Thawng Za Pum

Note: Hihi a luanciam caan ah a ttial cangmi asi ko nain, a hmantukmi le ruahnak ttha atu lio kan ram nih a herh bak si caah ka vun share tthannak asi.