Hakha Dawrhlun Sang ah aho si hngalh lo mi nih Pi Tum Nawn te inn duah timh, an hmih manh. Hakha Dawrhlun Sang um Pi Tum Nawn te inn cu January 28 zaan 11:30 hrawng ah aho a si hngalh lo mi nih duah a timh, an inntang thing-ai pon in a duah hmasa i inn ngeitu nih an phalh manh, tiah kan theih. “Zaan 11:30 hrawng ah a si. Ka hun i thang duak i meikhu rim a nam.

Ka tho i kan innpi le innte kar cu meikhu a khat dih. Hlei in ka vung tum cu kan inntang thing-ai pon hi tamlak a rak tlaih. Kan thing hi kum thumli a ro cang mi an si i minutes 10 hrawng rau sehlaw a ciam dih hnga. Kan tuang zong a thling an chuak. Innpa Aa Biak le an nu nih an hun kan zuanhnawh i kan hmih khawh. Thing-ai zong cu a thlanglei le vawlei ri in si loin a lai in an duah. Meifar bultan zong a um. Innpa chakthlang nih meifar pin ah datsi tlawmpal cu an telh theo lai, tiah an chim cio. Kan motorcycle zong lamlai ah an chiahtaak,” tiah inn ngeitu Pi Tum Nawn fanu Hnianghniang nih The Hakha Post ah a chim.

Hi kong ah Dawrhlun Sang khuabawi Pu Hmun Sang Lian nih, “Hi inn duah timtu hi Sang dang minung cu an si lai lo. Kanmah Sang minung an si ko lai. Mino he i bawm in zaan ah zohfel, motorcycle firtu zong tlaih khawh i zuam le biatak tein cawlcangh kan i tim ko. Hi bantuk thil a tuahtu cu kan tlaih khawh ahcun phung le phai nih a zulhcolh ko lai,” tiah The Hakha Post ah a chim. Atu bantuk hin nikum zong ah atu inn ngeitu Hnianghniang a tale inn zong duahpiak an rak timh bal cang. Hi kong ah Dawrhlun khuabawi le mino i bawm in biatak te hlathlai le zohfel an i tim, tiah kan theih. Credit: The Hakha Post