Hakha Khuachung Dinti kongah mifir pawl min tling tein an von langhter dih

Chin News

Hakha Khuachung Dinti Peknak Cu Thla 4 Ah Dihding Si Nain Kum 4 Tiang Ah An Dih Kho Rih Lo. Chinram Hakha khualipi dinti peknak ding ah Myanmar tangka 2.9 billions dih in 2016 October thla ah Tender an auh i 2017 March ah dihding ti in timhtuahmi a si nain atu tiang an dih kho rihlo.

Minung thong kul(20000) renglo khuasaknak Hakha khuapi dinti peknak cu caan rikhiah ning in an lim khawhlo caah voi thum tiang bak caan an sauh piaknak kan tuah hna tiah siimanking he pehtlai in Pyine Cozah tuanvo ngeitu nih cathanh a chuah. Hi kong ah caan rikhiah ning in an limlo nak a ruang cu siimanking umnak ah kal in tahnak, map suainak, design hmantlak suainak, an hmanmi system lungtlingpinak le Siimanking suainak lei le thiamsaannak lei le Experience ngeimi Company an si maw silo ti felfainak ttha tein an rak chek hlatlo caah si siimanking atlamtling lonak asi tiah cathanh an chuah.

Eihmuar Ruang ah ( tazacuai (Azizut) atongmi Pyine HtweOh Nih hruaimi Simaanking.

Hakha khuapi dinti peknak siimanking caah Cawtu le Ttuantu tiin Tender 2 an auh ii Yangon ah hram bunhmi K&DL Company le Moekoh Shwezi Company hna nih an ngah dih. Cu caah Tender ngahtu Company hna le Chin pyine cozah Atunzihmu simi Atwetwe Ohchohzimu U Pyung Chu hna cu hnatlaknak minsen an thut i 2017 March thla dih ah lim ding in hnatlaknak tuah a rak si.

Rian caan rikhiah ah an limlo caah 2017 May thla tiang avoikhatnak caan an sauh piak hna mah May thla ah cun Hakha Furpi a si caah October tiang avoihnihnak caan sauh piak ding in Company nih an nawl hna. Cu ti a voihnihnak caan an sauhpiak hna lio ah Moekoh Shweezi Company Director simi U Kyaw Soe Naing le Pyine Cozah lutlai simi U Piong Cho hna cu eihmuarnak lei upadi in a tazacui (zizut) an ton caah rianhma a kal tilo i a voithumnak caan sauh piak an si tthan tiah an chim. Hi a zizut an tonnak cu 2015 lio i Yangon khua ah hmunhma i cawkzuarnak kong he pehtlai in a si ii 2017 july ah aziazut an ton hi a si . Hi tin tazacaui (Azizut) lio ah hin U Piong Cho hi Pyithazi Vuanci Tthana ah lutlaibik chantu dirhhmun in rian a ttuan lio a si i Chinram ah an tthial i Hakha dinti kong ah Coza rianttuantu Secretary ah ttuanmi asi.

Dinti peknak ah ttuanvo latu Company pahnih hna i ai pehtlami an si i siimanking ttuanvo laktu U Piongcho he zong pumpak in ai thei hngalmi le ai kommi an si tiah Chin Pyine Siipin Vuanci U Soe Htet nih Myanmar Now media ah a chim. Moekoh Shwezi Company Director U Kyaw Soe Naing cu tazacuai (azizut) a ton tik ah a tangmi rian cu K&DL company nih pehzulh ttuanseh tiah Vuancichoh le Pyine Hluttaw speaker nih kaa in biachahnak an tuah i siimanking he pehtlai in fiang tein kan thei lo tiah thanhca nih an langhter. Cucaah Hakha khua dinti peknak Attwettwe Usi Thanah nih Hakah dinti siimanking cu 2017 December thladih tiang a voithumnak caan an sauh piak tthan hna. Hi dinti peknak rian hi Engineer thiamsang an tamnak Siipin nih hruaiding ah biachanh ding in Chin Pyine Vuancichoh sin ah kan rak chuahpi lengmang nain Vuancichoh nih a duhlo i Attwe ttwe ohchohzi tangtu ah a ap tiah Siipin Director hlun U ThlaHre nih a chim.

Voithum tiang caan sauhpiak ansi ko nain a tutiang a tlamtling dih lomi Hakha dinti kong ah A Voihnih Hluttaw caan chung ah limdih ding ah Pyine Cozah sin ah Paletwa peng Meekuang hmun(2) Pyine Hluttaw kuzale U PyiMin nih December 4 ah azigyi a su in a chuahpi. Hi asu a nun lonak hnga Pyine Cozah lei in Vuancichoh le Siipin Vuanci le Bandazi Vuanci hna nih Hluttaw ah biatak tein an i al hna i Vote an thlak tik ah hi a su nih a tei caah nunter asi.

Dinti a tlamtlin rih lomi hi Siimankinh Design ruang ah asi caah ttuanvo ngeitu pawl cu tazacui (azizut) an si lai tiah Pyine Vuancichoh nih Hluttaw ah a chim nain zei bantu bu dah a zizut ding timi bel fiang in a chimlo. Siimanking he pehtlai in Siipin vuanci hlun Salai Isaac Khen le Siipin taayazi in Hgnunciazihmu U Thla Hre nih ttuanvo an laak i Ttuanvo lakmi ruang ah an rian in an i dincang tiah Chin Pyine Vuancichoh Salai Lianluai nihcun a chimchih.

Siipin vuanci in kumhnih leng rian a ttuantu Salai Isaak Khen cu May thla 2018 ah a rian a dinmi a si i Hakha Bazar, Hakha khuapi siimanking le Falam dinti siimanking hna caan rikhiahnak ah dih ding in rian a ttuan kho lo caah amah tein rian a dingnak asi tiah rian in a din lio ah arak chimbal cangmi a si.

Hakha khua dinti peknak kong he prhtlai in Tender an auh lio ah quality tthami company ttha te’n zohfel loin an um caah asi i Tender chektu hna cung ah mawhphurhnak a um tiah nikum i Pyine Sazinsih choh cathanh a chuahmi ah ai tel. Rian an dihmi ttha tein zohfel loin Tangka a petu Htweoh le thilri cawknak ah phaisa pekchung lio ah Sachoh he ai kaih maw kaihlo tiah a zohfel hmasa lomi le thilri quality a ttha maw tthalo ti an chek lo caah a tlamtling lonak asi. Ti Pipe an cawknak ah Company pahnih fonh in an dih lai timi nak leng in ting 3000 mantluk a hlei i an cawk caah a hleimi pipe pawl cu hman tthan awk an tthat tuk lo caah Ram phaisa duhpaoh soksam bantuk si tiah Sazinsih Choh nih cathanh ah a tel.

Hakha dinti pekchanhnak kong ah ttuanvo ngeitu Company pawl hi Upadi ning te’n dantat ding in Hluttaw kuzale pawl nih hluttaw ah an chuahpi lengmang ko nain Caan rikhiah chung i rian an lim lo man phaisaa an liam ko cang tiah Vuanci Soe Htet nihcun a chim. A tu cu an dih dengmang cang i an dih hirhiar tik ahcun Budget a tlami 2.9billions leng ah Ting 9700 tluk a hlei in hman asi te lai tiah a chim chih. Vuanci Soe Htet nihcun Company 2 in Director pawl nih a herhmi an liam ko cang caah tazacuai awk an tthalo tiah a chim. “Phaisaa an pek dih cang, kanmah cu Myanmar miphun kan si caah “win-win” kap hnih caah tthatnak a chuah cu ta, tazacuai ding ah cun a ttha lo tiah kan ruah” tiin U Soe Htet nih cun Myanmar Now ah achim.

A si nain Matupi Peng Mekuanghmun No.(1) in Pyine Hluttaw kuzale U Aung Lyan nih cun ”’ Ziah Cozah nih taza an cuai hna lai lo le an cuai awk hrimhhrim a si. Tazacuai an duh lonak a ruang i a um lai Pehtlainak an ngei i si ko lai..Kei cu ka lung an hring”tiah a chim. Ref: Myanmar Now
Translated by Simon

Note: Hi thawngpang cu Salai Dokhar nih a taarmi lakchinmi a si.

Leave a Reply