Hakha Inn Kanghnak ah Minung pakhat a thi

Chin News

Tuzaan suimilaam 11:00 hrawngah Hakha khuathar Pu Kio Ling inn a kang i a pawngkam in pathum zong a kangh chih tiang theih a si. Hakha meithat zung nih an phalh leng ko nain, an phalh kho loin a kangh ziam dih tiaih theih a si fawn. Zeiruang ahdah a kangh ti kan thei kho rih lo.

Image may contain: fire and night

Cu inn kanghnak ruangah minung pakhat a nunnak a liam tiah theih a si. A nunnak a liammi hi a ho set dah a si ti langhter a si rih loh. Fiang deuh in a hnuah thawngthanh khawh kan rak izuam lai. Tantaakmi chungkhar Bawipa nih hnem hram ko hna seh. Hi kong he pehtlai in The Hakh Times nih a tanglei bantukin a taar.

Image may contain: night and fire

Breaking News: Hakha Khuathar ah inn a kaang i minung pakhat a thi. 2021 January 9 zaan suimilaam 11:00 hrawng ah Hakha Khuathar ah inn a kaang i minung pakhat a kaanghchih. Inn a kaang mi hi a dihlak ah inn 3 a si i a kaangh dih. Inn kaangh aa thoknak ah a um mi pakhat cu mei mih a kaanghchih tiah Hakha GAD nih a langhter. Fiangfai deuh in tial khawh kan vun i zuam lai. The Hakha Times

Thawngpang dang rak rel chih: Hmuhning-Ziknawh eitu maw kan palh deuh, a petu dah?

By: Salai KB Thawng

Ka tlangtar hi voi tam nawn ka tial bal cang mi a si nain ka hun nolh rih ko lai. Nizaan naihrawng biachawkvai a leng mi cu, “Atu ahcun Bawi pawl kha tangka in zik an nawh ti hna lo. An nupile tu kha tangka si loin suitlang an pek cang hna,” tiah biachawkvai a leng. “Biachawkvai” kan ti bantuk in aho nih dah a pek i ahodah a pek, ahodah a cohlangtu a si ti cu kan hngal kho lo.

Khatlei ah Asia Foundation nih, Ziknawh eihmuar sang bik cu Chinram a si, tiah cathanh a rak chuah bal. Hi kong ah Chin Ramkulh Cozah Chief Minister Salai Lian Luai nih, Asia Foundation tuanvo ngeitu he tonbiaruahnak kan ngei cang. A dik lo mi a si. Cucaah, kanmah Chin Cozah website zong ah kan tar cang. A dik lo mi an kan puh bia a si,” tiah a rak ka chimh bal.

Asinain, midingfel ah kan ruah mi hna zong hi tangka hmai ahcun kan mit a mui tawn. Cucu, al khawh lo mi thil a si. Hluttaw Palai kan chuahka ahcun, Ziknawh eihmuar doh hi kaa hmaithlak lai,” ti cu kan biatlaih cio a si nain kum khat a hung liam, kum hnih a hung liam i a donghnak ahcun kan i rum phahnak ko cu mu. A ngaingai cu Bawi pawl hi an lahkhah (thlahlawh) lawng cun an rum kho nemmam lai lo. Mirum an si kho bal lai lo. A pinlei thil pawl ruang tu ah khin, taihkhaan hna kan caw. Innlo tha le hmun tha pipi hna kan ngei.

Ka chim tawn, Kawl holh in Vuanthan ti mi cu, “Thilrit phurtu” tinak a si. Vuangyi ti mi hoi cu, “Thil rit taktak phurtu le rian aa khinh mi an si.” Hluttaw ti mi cu “Mizapi ai-awhtu, lamkaltu Palai” tinak a si fawn. Asinain, nihin tu ahcun Myanmar ramchung ah sifak bik kan si rih ko. Mizapi ca ah kan tuan lengluang nain kanmah pumpak ca ah kan tuan mi a tam deuh hun ti awk dedeng khin rian kan tuan.

“Tangka haang cu akha” tiah an chim theo. Cozah thar zong ah ahodah Chief Minister a si lai. Ahodah Minister a si lai. Ahodah Hluttaw Speaker a si lai, ti cu a fiang rih lo nain atute hin an i ruahcia a herh mi a um. “Kei cu mizapi nih mee an ka peknak thawng in MP ka tling, Minister ka tling,” ti hi zeitik hmanh ah kan philhlo ding a si. Meepek sawm lio i na biakam vialte na tlinh hlan lo thilrit phurh i tim ko. Cu lo ahcun, na hnulei in kutchu-tuh naa huah te ko lai.

Ka bia ka fun lai. Tender hmuh duh rumro ruang ahcun maw, suitlang hna cu kan hman ko (Tehte cu a um lo, biachawkvai ka ti cang). Tangka tom cu maw kan chehhnawh rih hna. Company pawl, nangmah maw sual deuh, na va pek i a cohlangtu dah?

Palai a rak i cuh mi Pi Iang Tial bia cun, “Nan riantuan mi hi tanakha thuh mi sawhsawh an si. Sau a nguh mi zong an si fawn lo,” tiah a rak chim mi kha a dik ko hnga lo maw? Apetu nangmah le keimah maw sual deuh, a cohlangtu dah, ti hi ruah a phu ngaingai cang. Cu nih cun maw miphun le ram ca ah rian kan tuan, kan ti ngam rih hnga?

Copyright @ Chin World News Evening

Leave a Reply