Hakha Inn Hmun Samhnak Kong Ah:

The Chinland Post nih Pu Khua Kung le Pu Ral Kham tbk biahalnak an tuahmi vialte ttha tein ka rak zoh dih. Cucaah atu tan ah Chin ramkulh cozah hi, a tlangpi in an palh lo tiah ka ruah.

Atu inn hmun an samhnak le inn an hrawhnak hrawng khi kan ngakchiat lioah kan rak tlawnlennak nawi pawng a si. Cu lioah inn pahnih thum te hrawng lawng khi a rak um. Cucaah Pu Khua Kung, Pu Ral Kham le Pu Sui Bik Thang an chimmi hi ka zumh.

Atu tan ah a palhmi cu: 1. A hman lo ning in keimah ram a si tiah inn hmun a zuarmi pawl an si. 2. Cu an zuarmi mekaram a chuahpiak ve tu, vawleitahnak zung ah rian a ttuanmi pawl an si. 3. Hi hna phu hnih hi Chin ramkulh cozah nih hlathlai in sual phawt ding an si.

An palh venak: Chin ramkulh cozah an palh venak tu cu, thawngla mi an kham mi hna tu hi a si. An kham hna bu in an lak tthiam ko i an palh chinchin.

An ttuan tawk an ttuan ve ko: 1. Innhmun samhnak tawlreltu hna nih an si khawh tawk in, pupa ram a si, ka ram a si tiah aa timi pawl an ton ko hna. An i tonnak tlam a tling lo i a si. 2. Kum saupi dum a rak tuah cang mi le cuti in a langhter kho mi cu inn hmun kan i pek ve hna lai tiah an ti ko hna. 3. Inn an ttheh lai zong ah amah tein inn a tthet mi cu inn hmun kan i pek tthan hna lai tiah an ti ko hna. A cheu nih an duh lo.

Zaangfak an si: 1. Khuate lei in Hakha ah a rak kai i, zei hngal loin puaisa hna sinah inn hmun a caw mi hna cu zaangfak taktak an si. Cozah nih an kong biatak tein ruahpiak hna sehlaw a ttha tuk hnga.

2). Atu cawbuk le nawi pawng inn hmun samhnak ah kum saupi dum a rak tuah cang mi le cuti a langhter kho tu cu Chin ramkulh cozah nih inn hmun pek venak an tuah hrimhrim hna ding a si. Kan in pek ve hna lai tiah Cozah nih an timi zong a tak in an tuah hrim ding a si.

3). Amah tein inn a tthet mi hna zong, Cozah nih an biakam bantuk in inn hmun an pek tthan hna ding a si.-Kan biahram in langhter cang bang, atu tan ah Chin ramkulh cozah hi, a tlangpi in an palh lo tiah ka ruah.

Credit: Lian Ding Hmung