Hakha Inn Hmun Buainak Kongah Pu Than Hmung Biachim Uar  A Um Kho Taktak Rak Rel Ve Hmanh!

Hakha inn hmun buai nak kong ah ka ruahnak: Miphun phunkhat khuasak ti nak hmun ah cun Mifim kan um lai mihrut kan um lai, mitha kan um lai misual kan um lai, mirum kan um lai i sifakrethei zong kan um lai. Hi bantuk in dirhmun phunphun a ngei mi Laimiphun kan Pa ca ah U Soethet cu Pathian nih a kan thim piak mi kan pa pakhat a si ve. Mifim mitha le mirum hna i an Pa lawng a si lo. Mihrut misual le sifakrethei vialte hna i kan Pa zong a si ve. Chungkhar zongah fatha an um bantuk in fathalo zong an um ve i an dihlak i Pa kan si ko i an dihlak in kanfa le an si ko. Chimh ngai lo fa sual pawl kha kan tuk kan velh hna. A si nain an caah a tha bik in khua kan khan piak thiamthiam ko hna.

Cu ve bantukin a tu i phung ninglo inn sa ti mi pawl zong hi aa tlak mi dantatnak pe hna seh law inn theh piak ding timi tu cu ngaithiam ko hna seh. Cu belte cu Sipin zong nih Hakha khualipi dawhter, thatter le thanchoter kan duh an ti bantukin innsa pawl zong nih an ti ve ko i mipi zong nih kan ti ve. Cu caah Sipin nih inn design suai piak hna seh law ri an khiah piak mi hna caan chung ah lim lakin inn sa cio hna seh. Khiah piak mi ri kum le caan chung ah inn a sa kholo mi nih a sa kho hnga mi sin ah zuar ko hna seh. Ri caan chung ah a sa kholo mi le a zuar kholo mi paphpaoh kha Sipin nih ting piak hna seh.

Cu ti ning cun a tha bik lai ka ti. A tu ah hin Hakha khualipi tuanbia a tial cuahmah mi zong an um i hmailei zong ah a tial te ding kanfa kan nau an um len te lai. A tu ning bantukin inn hrawhpiak a si ahcun tuanbia chia taktak a si lai i, KanPa U Soethet min zong tuanbiachia chungah a taang lai. Kan Pa a si bantukin tuanbia chia chungah a min a taan lai cu kan siang hrimhrim lo. Hi phung ninglo innsa timipawl a ngaihthiam hna ruangah hin a hohmanh nih kan soisel in kan thangchiat lai lo.

Nawl ngailo mi le misual pawl zong a kan dawtu , kan zawn a kanruat tu le a kan ngaithiam khotu kan Pa a si tiah kan conglawmh kan thangthat lai i upat tihzah nak tu kan pek chinchin ding a si.
Note: A si khawh ahcun fb i post mi le comment pawl hi Media pawl nih meeting ah kan chim piak kho ve u law a tha hnga.

Credit: Pu Than Hmung