Chin State, Halkha khualipi thawngpang- December thla a hung phak cun Chin State chungah khualipi pakhat a simi Halkha hi a kik cem lai tiah ruah a si. Kum dang hmanh in a kik deuh rua ti awk in a um. December ni 19 Halkha cu a kih tuk ruangah ti le dapti viale a khal tiah IPRD Hakha nih a taar.

Nikhua lei a tahtu hna nih an chimmi cu tutan Halkha khualipi a kik hi Minus 4.7°C bak a si tiah an chim. Minus 4.7°C cu a kik taktak tinak a si. Biatak tein i ralrin a haumi thil pakhat a si. A kih ruangah zingka i mehhang a zuarmi le thil puan a zuarmi dawr nih harsatnak tampi an ton. Asinain, Bazar cu an on ṭhiamṭhiam ko rih i Bazar kaimi zong an um ṭhiamṭhiam ko tiah an taar chih fawn.

Zingka i Bazar a kaimi minung pakhat nih a chimmi cu,“Zingka te ah tho in Bazar kalmi kan si i a kih tuk ahhin angki leng lawng nih a kan zat lo i puan tiang kan i aih chih. A fawi bak loh. A kik tuk hringhran. Asinain, Bazar cu kal awk lo a ṭhat lo caah kan kai ṭhiamṭhiam ko,” tiah a chim.

Atu bantukin a kih tuk ruangah (Minus 4.7°C a phan) zingka Bazar a ṭhumi pawl le thil puan a zuarmi hna nih harsatnak an ton pah. A kih tuk caah duhning in an cawlcang kho lo tiah theih a si. Minus 4.7°C tiangtiang a phak cangmi hi cu i ralrin taktak aherh. Damlo zawtfah a fawi te caah kan iralrin taktak aherh. Chirhchan-IPRD Hakha

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan ṭialmi hi areltu mipi caah ṭhathnem santlaih, theihtleih ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan ṭialmi kan palhnak a um  cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Na relmi thawngpang hna hi midang nih an rel khawh ve nak hnga aṭha tiah na ruahmi a um ahcun share in rak kan bawm ve. Kan ca a kan rel piaktu nan dihlak cungah kan ilawm. Upatnak he Admin