Hakha khuami, Nawi a tuahtu hna chungkhar (30) nih Rampi ruahnak petu Pi Aung San Suu Kyi le Rampi President Win Myint sin ah Nawi Dam tuah kan duh lo timi duh lonak ca an kuat tiah theih asi.

Chin ramkulh Cozah hruainak in Nawi Tidil (Dam) tuah ding tiah timhtuah mi cu Lo ngeitu hna nih an cohlang kho lo. Cu caah aluancia July 23 lio ah khan rampi ruahnak petu a simi Pi Aung San Suu Kyi sin ah an duh lonak kong ca an rak kuat cang.

Cu tuthla September 4 ah khan rampi President a simi Pu Win Myint sin ah ca an kuat nolh ṭhan. Nawi Dam tuah ding mi an duh lonak kong hi a luancia March 11 lio zong ah khan Chin ramkulh Cozah lutlai, Cheif minister Pu Lian Luai sin zong ah duh lonak ca an rak kuat cang.

Nawi Tiva hrawngah Lo a tuahmi hna chungkhar (30) nih duh lonak ca an kuat mi ah an telh chihmi cu 1. Nawi Tidil (Dam) nan tuah ahcun Hakha khuapi Hnawm vialte Nawi Tiva kam ah aa dil dih lai, hnawmtam in a khat lai.

2. Lei Ekah 30 leng le a dang kan cinthlak vialte a rawk dih lai, Lo le lei tuahnak hmunhma kan ngei ti lai lo. 3. Nawi tiva rinhchan tein a paw aa cawmmi, lei a tuah mi eidin tirawl kan ngei ti lai lo. 4. Vawlei a fek lo, cucaah Nawi Dam nan tuah ahcun Hakha khuapi ahnu lei hmunhma siseh, Hakha University caah thinphang a si tiah an langhter chih hi asi.

Nawi Tidil (Dam) tuah ding hi Budget Billion 10 dih in Chin ramkulh Cozah nih a timhtuahmi a si i kum(3) chung ah lim ding i planning zong a suai dih cang mi asi. Asinain Nawi Tiva kam ah lo a tuahmi, lei a tuahmi hna nih an duhlonak biatak tein an langhter peng ve hi asi. -Chin News Journal