Hakha Cawbuk sang, khuabawi Pu Than Lwin Oo cu Cawbuk sang ummi chungkhar 230 nih Cozah sinah a rian kan phuah piak uh tiah nawlnak an tuah. Cozah nih an phuah piak hna lo cun, lamzawh duh in duh lonak langhter zong an i tim theih kan theih.

Hi kong he pehtlai in, A lamkip Cawbuk sang ṭhancho bu Chiarman a simi Pu Ni Kam nih,“Cawbuk sang khuabawi Pu Than Lwin Oo hi khuabawi a ṭuannak in nihinni tiang mipi he tonbiaruahnak voikhat hmanh a ngei bal lo. General meeting zong a au bal lo. Amah duhning paoh in rian a ṭuan i kan sang (Cawbuk sang) chungah ṭhanchonak zeihmanh a tuahmi a um lo.

“Cawbuk sang kan vawlei hi a duh ti paoh in a tuah i, kan sang ah inn hmun zong a lawngmi pakhat hmanh um ti loin a kan zuar kanh dih. Cawbuk sang ummi ngaichia in kan um. Cun, sifak santlai pawl cu inn hmun kan peek hna lai tiah phaisa a hal hna. Inn hmun zong a pek hna lo an phaisa zong a khirh ti hna lo i cuticun chungkhar ngaihcia in an um hna.

“Inn hmun pakhat ahhin ting 250000kyat le 150000 kyat tiin a lak hna. A cheu cu 200000 kyat a lakmi hna an um. 100000 kyat a lakmi hna zong an um i inn hmun he phaisa he pek ti loin a chiahmi hna tampi an um. Amah khuabawi a ṭuan hrawmthawk in nihinni tiang, Cawbuk sang caah ṭhancho zeihmanh a tuahmi a um lo. Cucaah, Cawbuk sang ummi chungkhar 230 ai-awh in thawngthanhnak kan rak tuah hi a si,”tiah Pu Ni Kham nih cun a chim.

“July thla chungah, kan khuabawi pa nih a rian in kan phuahpiak uh tiah cunglei nawlneitu sinah ca an kan ṭial. Asinain nawlngeitu hna nih a ṭha ko lai tiin an kan ti i, nihinni tiang a konglam zeihmanh an kan chim ceih piak lo caah, atu cu lamzawh in kan au ve cang lai tiah timhtuahnak kan ngei.

“Vuanci Sui Ṭhio zong kan chawnh, Vuanci dang zong kan chawnh hna i kan ton hna tikah a ṭha ko lai ti lawngin an ti. Nihinni tiang Khubawi pa a kongchim ceihnak zong a kan tuah piak lo caah, Cawbuk um mipi kan lungfak a si i, cucaah lamzawh kan i timhnak hi a si.

“Cawbuk sang ummi cheukhat pawl cu, kan peknak lai ti si loin, hi ka hmun kan pek tiah a ti hna i phaisa an pek. Phaisa an pek hnuah, hi ka hmun cu a si kho ṭhan lo. Kan pe ṭhan lo, kan cuh ṭhan a ti hna i a inn hmun lawng a chuah ṭhan hna i phaisa a khirh ti hna lo. Cawbuk sang ummi hi Acozah nih an kan nek deuh hrimhrim ko,”tiah Pu Ni Kham nih cun a chim chap. Chirhchan-The Hakha Post

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan ṭialmi hi areltu mipi caah ṭhathnem santlaih, theihtleih ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan ṭialmi kan palhnak a um  cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Cun, kan ca a kan rel piaktu nan dihlak cungah kan  ilawm. Upatnak he Admin

Note: Video kan chiah i tlamtling deuh in ngaih khawh a si lai.