Hakha Ah Western Union In Tangka Kuatmi Paoh KBZ Bank Ah Fawi Tein In Chuah Khawh Si Ti Lo.

Chin News

Western Union In Tangka Kuatmi Paoh Hakha KBZ Bank Ah Fawi Tein In Chuah Khawh A Si Ti Lo. Chin ramkulh, Hakha KBZ bank ah Western Union in tangka kuatmi paoh cu duh paoh in chuah khawh a si lo, tiah tualchung mi hna sinin theih a si.

Wester Union in tangka kuatmi chuah duh ahcun zanlei suimilam 1:00 in KBZ nih pehtlaihnak ca ah an chiah mi phone number ah chawnh cio a si. Cu hmanh ahcun token ca lawng a si rih. Phone number pekmi a chawn khotu lawng nih token an ngei kho i a thaizing ah tangka va chuah a si, tiah Western Union in tangka a chuah kho lomi pakhat nih The Chin Post ah a chim.

Western Union in tangka chuah duh ahcun zanlei suimilam 1:00 in chawnh khawh a si an ti nain 2:40 tiang hmanh ah an phone a lawng lo, tiah a chim chap. Cu pinah Hakha KBZ bank ah a tam bik tangka kyats sing 3 lawng chuah a khawh a si i SAC kuttang Myanmar Economics Bank ah a tam bik kyats sing 20 lawng chuah khawh a si, tiah theih a si. Credit: The Chin Post

Thawngdang: Chin ramkulh, Paletwa peng chung ah ralkap nih ṭha tein hmunhma an khuarnak byuha sakhaan telh in ralkap sakhaan 17 nak tlawm lo cu ni 45 chung ah kan lak khawh tiah AA nih a thanh. Operation 1027 an thawk ni October 27 in December 10 tiang AA nih Rakhine ram le Chin ramkulh, Paletwa peng chung ah ralkap sakhaan, palek sakhaan, ralkap le palek nih hmunhma an khuarnak sakhaan pawl le BGF sakhaan tiah a zapi sakhaan 142 an lak khawh cang i cu chung ah Paletwa peng chung um ralkap sakhaan 17 nak tlawm lo aa tel tiah December 14 zaanlei ah an thanh.

Paletwa peng cung ah Helicopter tual hna telh in ralkap Ta-run-ai byuha sakhaan, Nung-bu byuha sakhaan, Myeik-wa sakhaan, mawṭaw lam ah himnak an laknak sakhaan, Point 391 sakhaan, Pakawa sakhaan, Point 351 sakhaan, Du-chaung-wa sakhaan, Sa-nwin sakhaan, LIB 289 a pawngkam sakhaan hme 3 le ralkap gate pawl an lak khawh hi a si.

Cun La-mui tlang sakhaan, Yin-kwai tlang sakhaan, Point 129 sakhaan, Point 159 sakhaan, Ok-thae-ma-wa khua pawng um sakhaan le Abaungwa khua pawng sakhaan hna zong AA nih an lak khawh.

AA nih Rakhine ram chung Sittwe, Kyaukphyo, Ramree, Myebon, Tongup, Thandwe, Ann, Maungdaw, Buthidaung, Rathaedaung, Ponnagyun, Chin ramkulh, Paletwa peng chung ah ralkap sakhaan 140 leng an lak khawh cang.

Paletwa peng chung kahdohnak pawl ah, ralkap Tactical Operator telh in ralkap tampi an thi i sakhaan lak kahdohnak ah AA lei in nunnak a pe mi zong an tam ve tiah an thanh.

Ralkap nih Paletwa peng chung kahdohnak ah a biapi mi an sakhaan pawl an sunghnak hnga lo Chemical Walfare Agents aa tel mi bom pawl hmang in vanlei kahdohnak, hriamngan kahdohnak voi tampi an tuah tiah AA nih an thanh.

Paletwa peng chung kahdohnak ah Chin miphun hriamtlai phu a si mi MDF zong AA he bawm in kahdohnak a tuah tiah theih a si. Atulio hi Paletwa peng, Sami khua lei zong ah kahdohnak a chuak tiah theih a si.

Leave a Reply