Yangon in Hakha ah a tlung mi Salai Ro Thawng Lin cu test result ah Negative a si ko nain Police pakhat nih Positive na si ko tiah Hakha Sizung ah a kal pi, cu lawng hmanh si loin Hakha Doctor pa nih thisen test zong kan i tuah nolh ti lai lo, Sizung ah khan um sawhsawh ko law a nicaan a tlin tikah na lawi te ko lai tiah a ti ve.

Hi thawngpang hi amah Salai Ro Thawng Lin pumpak nih a sining le a dirhmun vialte a langhter mi chung in theih chin cio mi asi. A taang lei hi a mah Ro Thawng Lin tial mi, a tawinak tein ka lak chin mi asi. Kawlca in a ṭialmi a si caah aa remnak in kan leh piak.

Keimah Ro Thawng Lin cu November 15, 2020 ah Yangon in ka chuahkehnak Laitlang ah ka rak tlung ve. Zaanlei suimilam 6pm hrawng ah Hakha University Quarantine Center ah an ka luh ter ve. Quarantine Center ah Ni(3) ka um hnu, 18 November 2020, zinglei suimilam 10am hrawng ah Swab (thisen test) nak an ka tuah ve. Lawmh awk ngai a si mi cu ka result ah Negative a si. A si nain Quarantine Center ahcun an ka um ter rih ko. Cun 23 November 2020, zinglei suimilam 10pm hrawng ah a voi 2nak thisen test nak Swab an ka tuah ṭhan. Cu zong ahcun result cu Negative a si rih caah keimah cu kaalawm ngai ngai.

Cun nihin 24 November 2020 ah khan Nawlngeitu office lei ah phone ka chawnh hna i voi 2 tiang Negative ka sinak pawl zong ka hei chimh hna. Cu i an ka ti mi cu Voi 2 tiang Negative a si ko zong ah Quarantine cu Ni(14) hrimhrim na um hau an ka ti tikah lunglawm tein a si ko tiah ka leh ve hna.

Asinain zaanlei suimilam 6pm hrawng ah University Quarantine Center hmai ah police pakhat a rak phan i phone in a ka chonh caah inn taang ahcun ka hei ṭum. Police pa nih bia a ka chimh cu ka vun lau ngai. A ruang cu Police pa nih Coronavirus zawtnak na ngei tiah a hun ka chimh diam. Cu ah a ka ti rih mi cu, an thisen sample cu Mandalay ah kan kuat, Mandalay lei nih result an kan thanh lai, cun Mandalay lei nih Hakha in minung pakhat aa tel an si sual ahcun nangmah na si ko lai a hun ka ti chap. A ruah awk ka hngal lo, nizaan tiang ah ka result cu Negative a si, cu hnu ah thisen laknak zong an tuah rih fawn lo i a tu ah le Positive na si a ka ti cu ka lau taktak.

Cu ti cun Ambulance in Hakha Sizung ahcun an ka kal pi. Hakha Sizung Doctor nu cu ka sining vialte ka chimh dih tikah a lau tuk ve. A si ahcun tiah amah nih cun Hakha Sizung Doctor pa, lutlai a hei chonh i a mah Doctor pa he phone cu an kan chonh ter. Ka sining vialte ka chimh khawh tikah kaa lawm ngai. A si nain a mak tuk hoi mi cu, Doctor pa nih cun a si ahcun Swab zong lak chap na hau ti lo, kha ti khan Sizung ah Ni(11) cu hei um sawhsawh ve ko law cu hnu cun inn ah na lawi te lai a ka ti, tiah Salai Ro Thawng Lin nih a ṭial hi asi.

Note: Hi thawngpang hi a mah Ro Thawng Lin nih a ṭialmi a si. Kawlca in a si caah a tawinak tein kan lak piak. The Hakha Post ah Kawlca in a tar mi rel khawh a si lai.