Hakha ah ralkap nih an vuakmi Pu Tin Cung “Ram ṭhatnak si cun ka thih zongah poi lo”-VIDEO

Chin News

Nizaan March 10 Hakha mipi lamzawhnak ah aa tel ve mi Hnaring khuami Pu Tin Cung cu ralkaap nih an velh tiah thawng kan theih. An velhning hi a fak ngaingai. Amah lawng hmanh si loin a hawipa Hnaring khuami ṭhiamṭhiam tlangvaal Tin Hmung an velh ve tiah theih a si.

Ralkaap nih an velhnak kong he pehtlai in amah nih a chimmi cu,”Zapi in (lamzawh dingin) kan ra i ka naupa he cun an kan tlaih. Ka naupa tu cu Mawṭaw pawngah an chiah. Zeiruang ah dah nan ka tlaih tiah ka ti hna i kan tlaih ko lai teh thih hmanh nan ngammi hi cu thi nan si ve ko tiah an ti.

“Tlawmpal i pakhat pa nih a ka velh hmasat. A hnuah pathum an si i an velh colh. Keimah zong nih cun ka velh ve hna. An velhnak hi ka hmaifang deuh ah a si. Anmah zong tlu lakin ka khen ve ko hna. An ka vuak lioah (ralkaap) an hawi le dang an tampi nain, an rak zuang (an ka zuan hnawh) lem loh.

“Ka hmai i voihnih an ka thongh ah ka tlu i ka tluknak hmun ah an ka zuan hnawh, an ka thongh chih colh. An ke in ka hmai tiangah an ka chuih chih fawn. Cu bu cun ka tho i an pathum cun ka thongh hna i thlanglei ah ka zaam (tli) i ka hawipa cu an tlaih nain velh loin Mawṭaw cungah an chiah colh,”tiah velh a tongmi Pu Tin Cung nih cun a chim.

“Kei hi fathum ngaimi ka si. Fapa pakhat le fanu pahnih ngeimi ka si i Hakha ah kum 2 le cheu lawng kan um rih. Atu zong sandapiahnak ka kal kho ṭhan. Nizaan ah an ka timi cu Sandahpiahnak i kan in hmuh ahcun kan in thah lai tiah an ka ti, tiah Pu Tin Cung nih cun a chim chap. Chirchan: The Hakha Times

Biakilh: Hi thawngpang hi The Hakha Times nih ralkaap velh a tongmi Pu Tin Cung tonbiaruhnak an ngeihmi chungin kan laakmi a si. Video a chimmi a fiang ning in kan von ṭialmi a si i palh sualnak um cun nan ka ruahthiamnak lai kan in nawl duh hna. VIDEO timi hmeh piak law fiang tein le tling tein rak ngai ve ṭhan.

Leave a Reply