Hakha Ah Datsi Man A Kai. Cheukhat Datsi Dawr Khar A Si, Gallon Khat Ah Kyats 25,000 A Phan.

Chin News

Hakha Ah Datsi Man A Kai Ṭhan; Cheukhat Datsi Dawr Khar A Si, Gallon Khat Ah Kyats 25,000 A Phan. Chin ramkulh khuapi Hakha ah datsi man a kai i cheukhat datsi dawr cu an kharnak a sau cang, tiah theih a si. Hakha khuapi ah datsi gallon khat ah kyats 25,000 tiang a phan cang. Cheukhat datsi dawr cu an datsi cahmi a phak ti lo caah dawr an khar cang. Thawl khat ah kyats 7,000 a phan. Hi tluk in datsi man a kai hi lam a awn lo caah a si, tiah tualchung mi pakhat nih The Chin Post ah a chim.

Hakha ah datsi dawr ngan pakhat a simi le mizapi nih a datsi a ṭha tiin an cawk ngainak Htu San Thit(ထူးဆန်းသစ်) datsi dawr zong ah datsi a dih i an kharnak a sau ngai cang. Datsi dawr hme deuh lawng ah cawk khawh a si nain a man a fah tuk cang caah zapi cu datsi cawknak an har kong datsi cawtu pakhat nih The Chin Post ah a chim.

Gangaw lei lam a awn rih lo caah khualtlawng motor le thil phor motor hna cu lampi ah an taap i caan sau ngai an rau cang. December zarhkhatnak ah Yangon in Hakha ah a tlung mi hna zong lam ah an taap, tiah theih a si.

Cu ṭhiamṭhiam in Hakha ah hruk-aih hnipuan a zuarmi hna zong a hlankan in thil an cah ko nain December zarhhnihnak tiang ah an thil a phan kho hlei lo, tiah theih a si.

“Christmas laksawng thil zalh ruah ah khuate lei in a rami hna zong an duh ningin thil an i cawk kho ti lo, a ruang cu kan thil cahmi a phak khawh ti lo caah a si. Kum dang December thla ahcun hruk-aih hnipuan thar tampi a phan tawn nain tu kum cu lam a awn lo caah a har ngaingai,” tiah thilpuan a zuarmi pakhat nih The Chin Post ah a chim. Credit: The Chin Post

Leave a Reply