Good News: Tamu Ah Ralhrang Sakhan Pakhat An Laak Pin Ah 6 An Tlaih Hna

Myanmar News

Sagaing ramṭhen, Tamu peng chaklei, Aungzeyar khuate ah a um mi ralkap ralkap sakhaan pakhat an lak khawh i ralkap lei thawng petu 6 an tlaih hna tiah KNA-Burma sin in thawng theih a si.

December 10 zinglei sml 8:30am hrawng ah Tamu peng chaklei, Aungzeyar khuate ah a um mi ralkap sakhaan pakhat cu dothlennak phu pawl nih an lak khawh hi a si. Ralkap lei thawng petu tiah ruah mi minung 6 zong an tlaih hna.

Cu ralkap sakhaan cu KNA-Burma le dothlennak phu pawl nih December 7 in kah hram an thawk i December 10 ah an lak khawh hi a si.

Kahdohnak chung ah KNA-Burma in kum 25 hriamtlai Lettinpao le pengkomh PDF in kum 22 a si mi hriamtlai 1 nih ram le miphun caah an nunnak an pek i adang hriamtlai 12 an i hliam tiah theih a si. Ref: T.C.P

Thawngpang dang: Min Aung Hlaing Nih Lasho Ralzaam A Laang In A Veh Hna. Hramhram nawlngeihnak a latu SAC hruaitu Min Aung Hlaing cu nizan December 10 ah Shan ramkulh chaklei ah tlawng in, Lasho khuapi chung ralkap siizung le Mansu phungki sianginn ah aa dormi ralzaam pawl cu a va veh hna, tiah SAC tlaihmi Media nih nizan ah an thanh.

Lasho khuachung ah aa dormi ralzaam pawl a ton hna lio ah Min Aung Hlaing le a zultu ralbawi cheukhat nih anmah pum vennak ca ah Pistol meithal pakhat cio an i thlaih hna. Shan ramkulh chaklei Kokang hmunram lawng si lo in Lasho khuapi le a kiangkap khuapi hna ah October thla thawk in kaphnih kar kahdohnak a fah ngai hnu, thla 1 a rauh ah SAC hruaitu le a kuttang pawl nih Lasho ralzaam cu an ton hna.

A luancia September 10 ni zong ah SAC hruaitu Min Aung Hlaing le ralbawi cheukhat cu Shanram chaklei hmunram le Lasho khuapi ah an ra i, Shanram chaklei Pyituhsit pawl he tonbiaruahnak an ngeih lio ah cun atu bantukin Pistol meithal an i thlaih lo, tiah an chim.

“Lasho khuapi chung um ralzaam pawl cu SAC hruaitu nih nizan ah a laang in a tlawn hna hnu ah Pyin Oo Lwin ah a kir ṭhan i Pyin Oo Lwin le a kiangkap vialte cu ralkap nih zarh khat tluk humhimnak an laak si cang,” tiah tualchung mi nih an chim.

Nihin December 11, zinglei zong ah Pyin Oo Lwin khuapi chuahnak Defense Services Technological Acedamy (DSTA) sianginn ah ralkap Training dih lawmhnak an tuah i SAC hruaitu Min Aung Hlaing nih a telpi hna, tiah tualchung mi nih cun an chim.

Leave a Reply