Good News: Shan Ramkulh Chaklei Namtu Khuapi Cu TNLA Nih An Laak I An Uk Cang.

Myanmar News

Shan Ramkulh Chaklei Namtu Khuapi Cu TNLA Nih An Laak I An Uk Cang. Shan ramkulh chaklei, Namtu khuapi ah umhmun a khuarmi SAC ralkap Khah-Mah-Yah 324 pawl cu Ta’ang ralkap TNLA nih nihin December 28, zinglei ah an kah hna i khuapi a ningpi in an laak khawh cang, tiah Namtu khua tualchung mi nih an chim.

SAC ralkap pawl nih nihin December 28, zing suimilam 4:00 tiang Namtu khuapi chung ah vanlawng in kahdohnak an pehzulh nain zinglei suimilam 6:00 hrawng ah TNLA nih an laak khawh, tiah Namtu khua tualchung mi pakhat nih a chim.

“SAC ralkap pawl nih vanlawng hmang in kahdohnak an tuah ṭhan lai tiin zumh a si caah tualchung mi hna cu a himnak hmun ah um rih ding in TNLA nih ralrin an pek hna. Cun atu kahdohnak kong he pehtlai in TNLA nih Namtu khuapi an laak i an uk cang timi cu fehter a si ko,” tiah TNLA he naihniam in a ummi pakhat nih a chim.

A luancia December 22 ni ah TNLA nih Namhsan le Manton khuapi cu an rak laak i cu khuapi pahnih he hmunram aa tlaimi Namtu khuapi zong nihin December 28 ah an laak khawh. Chaklei hriamtlai phu unau thum nih 1027 Operation an kalpi hnu ah Namtu khuapi telh in khuapi 10 an laak khawh cang i Kutkai, Lasho, Muse le Laukkai peng hna ah nihin December 28 tiang kahdohnak an pehzulh, tiah theih a si. Ref: The Chin Post

Leave a Reply