Good News: S.Korea Nih Kawlram Caah Dollar Nuai 3 A Bawmh Lai Kawl Ram Mipi Cu Alam Bak In Lam Cang Lai. South Korea cozah nih covid ruangah harsatnak tampi a tong lio mi Kawlram mipi caah humanitarian bawmhnak US dollar nuai  3 million kan bawmh lai tiin South Korea ramdang vuanci zung nih a chim. Atu tan bawmhnak hi ralhrangbu sinah si loin mipi sinah direct in fiangfai tein a phak khawhnak lam in kan pek hna lai tiah South Korea cozah nih a thanh.

South Korea cozah nih a thanhnak ah vawleicung ram cheukhat nih ralhrangbu cu kharphihnak an tuah lio a si bantukin South Korea zong nih mah hi a kalpi ve mi a sinain mipi bawmhnak belte cu pek rih a duh. Kawlram chungah democracy a ngah thannak hnga le remnak le daihnak a um than khawhnak dingin vawleicung ram hna he kan i zuam lai tiin August 26 ah khan South Korea cozah nih a thanh cang mi a si. NUG cu phungning tein ser mi cozah ah diplomacy in pom piak dingah South Korea cozah sin ah minung 270000 deng nih minthut in an nawl tiah South Korea president office nih a langhter. The chin post

Relchap Taiwan nih nuclear cahnak a hman in bomb thlak nak China raltuk vanlawng 19 cu Taiwan nitlak thlanglei ah a lut tiah a thanh. Taiwan ministry of National Defence nih cathanh a chuahnak ah China raltuk vanlawng 19 cu an ram chungah a lut. Nuclear bomb a keng khi mi vanlawng hna hi Taiwan nih defence identification zone (ADIZ) tiah an ri an khiahmi chungah a lut mi a si tiah a langhter.

Nizaan September 6 ah Taiwan ah a lut mi China air force ah nuclear a phor kho mi H-6 bomber 4 le anti-submarine air craft a tel tiah Taiwan defence ministry nih a chim. ADIZ hi national airspace a si i, ram venhimnak caah ramdang vanlawng hna cu zohfel tawn an si.Taiwan nih China vanlawng hna an luhnak map hna a chuah pin ah China vanlawng hna ralrinnak pek dingin combat aircraft hna cu a fial cawlh ve.

Hi kong he pehtlaih in China nih zeihmanh cathanhnak a tuah lo.China nih Taiwan hi an ramchungah a rel chih mi a si i, Taiwan nih mah hi a duh lo ngai mi a si. China nih ralkap vanlawng hna cu Taiwan ramchungah hin voi zeimawzat a fial cang hna. June thla ah hin raltuknak vanlawng 28 cu ADIZ ahhin a rak fial cang.January thla zong ah vanlawng 15 le April thla ah vanlawng 25 an lut cang tiah Taiwan nih a ti. China le Taiwan hi 1940 hrawngah ramchung i dohnak ruangah then a si hnuah Taiwan nih anmah phunghram dang tein a uk mi an sinain, China cozah nih Taiwan cu a si khawhnak lam in lak than a timh peng mi a si.