Thanlwin Tiva Kam Um SAC Ralkap Sakhan Cu KNLA Nih An Laak, SAC Ralkap 40 Leng An Thi

Karen ramkulh, KNU Brigade 5 hmunram um Thanlwin tiva kam ah a ummi SAC ralkap Mayhkar Htar sakhan cu KNLA ralkap nih, nihin March ni 28 zinglei ah an laak pin ah SAC ralkap 40 leng an thi, tiah theih a si.

Nihin March ni 28 zing suimilam 6:40AM ah KNU Brigade 5 hmunram um SAC ralkap Mayhkar Htar sakhan cu KNLA nih an laak pin ah zungukbawi telh in SAC ralkap 40 leng an thi. Hriamnam le zen-kuan tampi an chuh hna, KNLA lei in ralkap 4 hliamhma an pu ve, tiah theih a si.

“SAC ralkap sakhan kan laaknak kong thawngpang hi thuh awk a ṭhami a si lo, a ruang cu Thailand ram lei in SAC ralkap sakhan kan laakmi hmuh khawh dih a si. Kahdohnak hi minutes 50 tluk a rau,” tiah KNLA sin in theih a si. KNU Brigade 5 hmunram ah a ummi SAC ralkap Mayhkar Htar sakhan cu ralkap a za in an umnak sakhan ngan ngaimi a si, tiah theih a si. Souce: The Chin Post

SAC Nih April Thla Thawk In Hakha Ah Mei Man Khawlh Hram An Thawk Lai. Chin ramkulh, Hakha khuachung ah SAC nih a luancia March thla zarhhnihnak lioah mei man nan pek cang lai tiin loud speaker in an rak au, tiah theih a si.

Nan meterbox hman nan thlak lai i nawlngeitu hna sin ah viber in nan kuat lai asiloah zung ah nan va hmuhsak hna lai i, mei man nan liam lai. April thla in electric mei a hmangmi paoh mei man nan thawh cang lai. A thawh lomi cu nan meihri chahpiak dih nan si cang lai tiin an au, tiah theih a si.

SAC le nawlngeitu hna nih loud speaker in an au hnu in Hakha sang cheukhat ah an meterbox cu hman an thlak i zung ah an hmuhsak hna, tiah tualchung mi pakhat nih a chim.

“Meter box cu hman an thlak i zung ah an va hmuhsak hna tikah cheukhat cu kyats sing 12-13 kar a liam ding an si. Kum hnih chung ca mei man thawh ding a si tikah a tam tuk,” tiah a chim.

SAC cozah zung le SAC he pehtlai in rian a ṭuanmi zung cu thla fatin in mei man an liam, tiah theih a si. Source: The Chin Post