Sagaing ramṭhen, Chaung U ah SAC ralkap hna cu Chaung U People Defense Force(CHUPDF) nih bomb an puahhnawh hna i, SAC ralkap 12, tiah nihin August 9 ah CHUPDF nih cathanh an chuah. Nizaan August 8 ah Monywa pengkulh, Chaung U lamṭhen in a kalmi SAC ralkap hna cu, Kinmon khua an phak ah CHUPDF nih voi 6 tiang bomb an puahhnawh hna pin ah meithal in an kah hna. Cu kahdohnak ah cun SAC ralkap 12 an thi i, midang 33 hliam an tuar. CHUPDF lei cu hliamtuar um loin hnu kan tolh nain kan bomb lung 16 cu SAC ralkap nih an kan lakpiak, tiah an cathanh ah cun an langhter.

Cu bantuk ṭhiam in Mandalay ramṭhen, Tapeihkyin peng ah tuzing August 9 Sml 11:10 hrawng ahkhan Ayarwaddy tiva ah SAC ralkap riahcaw a phortu tilawng 6 hna security lakpiak ding in a kalmi SAC ralkap motor 3 cu Shiataw khua le Shwekyunpin khua kar ah PDF nih bomb lung 7 in hmunthum ah an puahhnawh hna i, SAC ralkap 5 an thi, tiah theih a si.

Natogyi Khua, Sakremhnak Zung Ah A Ummi SAC Ralkap Cu Hriamngan In Kah An Ton Caah Ralkap 4 An Thi: Mandalay ramṭhen, Minchan pengkomh Natogyi khua, sakremhnak zung(construction office) ah chinlung a chuih mi SAC ralkap 12 cu August 7 zanlei sml 5:00 hrawng ah hriamngan in PDF nih an hna caah ralkap 4 an thi, midang 5 hliamhma an pu, tiah Natogyi PDF nih an thanh.

“Tatma 99 tang ah a ummi ralkap 12 cu, chinlung an chuih lio ah hriamngan in kan kah hna i, ralbawi pakhat telh in 4 cu a hmun ah an thi colh. Bo thum pa le ralkap pakhat hi Myaikhtilar sii-inn ah an chiah hna,” tiah NPDF in ṭuanvo ngeitu nih a chim. Kah an ton hnuah SAC ralkap pawl cu khua kiangkap ah sentari an cawngh ter hna. Khuapau dohthlennak hi rianrang tein tei nan duh ahcun thazaang tampi in kan pe u, tiah Natogyi PDF nih forhfialnak an tuah.

Mansi Gyi Khuami Pakhat Cu Shanni Nationalities Army(SNA) Nih An Kahthah!: Banmauk peng, Mansi Gyi khuami pakhat cu “PDF he pehtlaihnak na ngei” tiah puh in Shanni Nationalities Army(SNA) nih an kahthah. Nizaan August 8 zaanlei sml 3 hrawng ah kum 30 hrawng a simi Ko Kyaw Thet cu dawr thilri a cawk lio ah SNA nih an kahthah i, nihin August 9 ah a ruak hlam ding in an kan chimh, tiah Banmauk Revolution-BR in tuanvo ngeitu pakhat nih a chim.

“Mansi Gyi khua ah SNA cu an ra i minung pakhat cu an tlaih. “Ko Kyaw Thet khoika dah a um” tiah tukvelh buin an tlaih mi pa cu an hal caah Ko Kyaw Thet umnak ah cun a kalpi hna. Ko Kyaw Thet cu a zaam i, a ke ah meithal in an kah hnu ah motor cung ah an khin i an kalpi. Tuzing ah cun a ruak hlam ding in a kan chimh ṭhan, tiah BR in ṭuanvo ngeitu pakhat nih cun a chim chap. Credit: The Chin Post