Good news: Ni 13 Chung Kahdohnak Ah Ralhrang Sakhan 150 Tluk An Laak.

Myanmar News

1027 Operation Kahdohnak Ni 13 Chung Ah Sakhan 150 Tluk An Laak. 1027 Operation kahdohnak ni 13 chung ah chaklei hriamtlai phu unau 3 le tualchung hriamtlai phu hna nih SAC ralkap sakhan a hme he a ngan he, a zate 150 tluk cu an laak khawh cang, tiah 1027 Operation phu nih an thanh.

Myanmar National Democratic Alliance Army(MNDAA) nih Monekoe peng zatlang i ukhruainak cu an ser khawh ṭhan cang i a pakhatnak hmunhma a simi hmunram cheukhat hna zong kan laak khawh ṭhan cang, tiah an langhter.

SAC ralkap bawmtu Pyituhsit pawl zong ṭihphang ngaiin an zaam dih i Monekoe pengkomh dihlak an laak khawhnak kong cu Kokang media nih an langhter. Operation cathanh an chuahmi ah; Monekoe SAC ralkap sakhan Byuhakone cu November 5 ni in kah hram an thawk i ni thum chung ah tualchung hriamtlai phu nih nunnak thap in thisen le thlanti he an laakmi sakhan pakhat a si.

November 5 le 6 ni ah SAC ralkap sakhan Byuhakone cu tualchung hriamtlai phu nih an kah i hriamngan chiahnak pakhat a puahkeh caah SAC ralkap ralbawi ngan pakhat a thi, tiah Kokang ralkap nih an thanh.

October 27 ni ah thawkmi 1027 Operation kahdohnak ni 13 chung ah Shan ramkulh chung Chinshwehaw, Theinni, Phaungsai, Pansai, Monekoe hmunram le Sagaing ramṭhen Kawlin khua, Tamu peng Khampat khua hna cu tualchung hriamtlai phu hna nih an laak khawh. Nihin November 8, ah Sagaing ramṭhen Pinlebu khua zong tualchung hriamtlai phu nih an laak khawh tiah social media ah a kai ngai nain tualchung hriamtlai phu nih fehter in thanhnak an tuah rih lo.

MNDAA le tualchung hriamtlai phu hna nih Kokang pengkomh, Toneshan hmunram kahdohnak cu nihin ah an thawk ṭhan i TNLA le MDY PDF pawl zong nih Naungchu peng ah kahdohnak an thawk ṭhan ve.

AA, KIA le PDF hna nih Sagaing ramṭhen Htichaingh peng, Kawlin peng le a dang hmunram hna ah kahdohnak an an pehzulh, tiah 1027 Operation phu nih an thanh. Credit: The Chin Post

Leave a Reply