Sagaing ramṭhen Indaw peng ah aluancia nithum chung ahkhan SAC ralkap le tualchung hriamtlai phufonh kar kahdohnak voihnih a chuak i, cu kahdohnak ah cun SAC ralkap 20 leng an thi, tiah Indaw Revolution nih an thanh. Indaw peng Aung Kung khua le Maw Ṭaith khua lei pawng hrawng ah June 18 in June 20 tiang kahdohnak voihnih a chuak. SAC ralkap hna cu KIA le Kata pengkomh battalion 2 Indaw lei i tual chung hriamtlai phufonh nih an kah hna.

June 18 ni kahdohnak ah SAC ralkap lei 20 hrawng an thi i, hliamhma tuar zong an zeimawzat an um. June 20 kahdohnak ah SAC ralkap 3 nak tlawm lo an thi ṭhan i, minung 10 hrawng nih hliam an tuar, tiah Indaw Revolution nih an thanh. June 18 kahdohnak ah SAC ralkap lei nih hriamngan an hman tuk caah kahdohnak a chuahnak hmun pawng ah a ummi ngakchia 4 le upa pakhat cu hriamngan nih a tlak hna ca ah hliamhma an tuar. June 20 kahdohnak ah tualchung hriamtlai phufonh lei in minung pakhat nih hliamhma atuar ve tiah an langhter.

Kaphnih kahdohnak ah hliamhma tuar mi SAC ralkap hna cu Indaw palik sakhan ah thlopbul an si, tiah Indaw Revolution nih an langhter chih. SAC Ralbawi Pakhat Dinhcaan Laak In Mandalay A Tlun Lio Ah Thah A Tong Yangon ah SAC kuttang rianṭuantu SAC ralbawi (ṭat-kyat-gyi) cu a chuah semnak Mandalay ah dinhcaan laak in atlung i, June 21, zinglei suimlam 7:30 hrawng ah meithal voi 5 kah a si i a thi, tiah Generation Z Power phu nih an thanh.

Ralbawi Myo Hṭway cu MaharAungMay AungChainTa sang ah eiding a cawk lio ah thah asi tiah theih asi. Thah a tong mi SAC ralbawipa hi a rianṭuannak hmun cu Yangon ah asi i, aumnak hmun taktak cu fiang in kan thei lo amah cu Mandalay mi asi tiah atu hi Generation Z Power Mandalay in ṭuanvo ngeitu nih achim.