Good News: Kawl Ram Chung Aum Mi Nawlngeihnak Lak Aduh Lo Mi phu Pohpoh He Hi Uknak Thalo Hi Kan Dohti Lai Tiah KNU Nih Thanh. Nawlngeihnak lak a duhlo mi phu poh he hi uknak thalo hi kan dohti lai tiah KNU nih thanh. Hramhram in nawlngeihnak an lak mi a duhlo mi phu pohpoh he hi uknak thalo hi kan dohti lai tiah KNU nih September 4 ah phunglut in an thanh. Federal le democracy thazaang thawnter ding ah fek tein kan dir i hi uknak thalo a dotu asiloah a duhlotu zeibantuk phu pohpoh he dirti in kan dohti lai tiah KNU nih an cathanh ah an tial.

SAC ralkap pawl tuahtonak in i runven nakding ah bawmh a herh mi hna cu mizei an si hmanh ah a si khawh chung in bawmh ding, ram chungral ahram dothlat ding adikfel mi remdaihnak pawl kong ah lam dang kawl in tawlrel ding tibantuk zong an tialchih. Rammi miza pi zong nih zalongte le tlukruang tein mah le tikhawhnak zawn cio in thazaang chuah cio ding forhfialnak cathanh an chuah.

Thawngdang February 1 in ralhrang phu hna nih hramhram nawlngeihnak an lak hnu ah ralhrang uk duhlo cawlcanghnak CDM ah a tel mi cozah riantuan hna cu federal journal nih cazin an lak ning ah Chin ramkulh cozah riantuan tu hna dihlak minung 14,591 an si, ramkulh cio in CDM cawlcanghnak ah tambik a tel mi cu Chin ramkulh chung in an si tiah an langhter. Chin ramkulh ah cozah riantu tu dihlak 20000 leng chung ah 14000 leng nih CDM cawlcanghnak ah an i tel caah zatuak in 72% leng a si .

Chin ramkulh ah CDM lutmi hna chung in ngandamnak lei cozah riantuan tu an tam. Mindat ah cun atu tiang ah sizung zong thaten hon khawh a si rih lo. Thazaang a tling tuk, a ruang cu Chin chung ah hin sibawi tampi an i tel, cheukhat cu Director reng zong an i tel. Cun zaanglek nak lei zong ah rampi min thatter tu hna zong an i tel.

An umnak department cio in reng sang zong nih CDM cawlcanghnak ah an i tel hna.Cucu Chin ramkulh CDM cawlcangh nak ah teinak ding ah  pakhat a si ” tiah CDM cawlcangh nak ah a tel mi cozah riantuan pakhat nih a chim. Ramkulh chungah Chin ramkulh in CDM cawl cangh nak tambik a tel kho mi a si, ralhrang phu hna nih rian sok ding in auhmi cozah cazin ning ah hmundang ramkulh le ramthen 14 chung ah rian sok tu dihlak hi minung thong leng an si nain , Chin ramkulh chung ahcun riansok tu minung pakhat hmanh an um lo tiah theih a si.