Asau ngai nain na rel cun na lung ah pakhatkhat a tang hrim lai ka zumh. November 29 zan ah ruah lo piin cakuat pakhat ka dong.

“Mengmeng, na dam lio si maw? Kan sang i amah le amah kha teh an dam lio si maw? Zeidah an lawh an inn lo hna” tiin biahram a domh. Cuticun biaruah kan peh i ”Germany Chin Agape Church nubu nih X’mas laksawng kuat kan duh hna i na kan pek piak kho lai maw?”a ti i keimah khi um zia thiam loin kai rak lawm. Pek piak kho tuk ee tiah lunglawm ngai in ka leh.

Tuchun ah GCAC nubu nih an kuat mi hna laksawng cu ka va hlam i zanlei sang ah ka va pek hna. Pakhat cu a fanu le a tu le he a um mi an si ka va pek hna ah an mithmai ah lawmhnak in a khat. Thluachuah za an ham piak hna. Cun adang pakhat in ah ka lan i a um lo caah voihnihnak ka kal ah kan i tong kho. Amah cu a pasal nih a liam tak cang mi a si i fa zong a ngei lo i unau zong a ngei lo. Amah tein a hmei mi a si i nifatin changreu zuar in a paw ai cawm mi a si.

A innchung ah ka luh ah ka hmuh colh mi cu ihkhun fate cung ah a zuat mi chizawh pifarual hnuk an rak i dinh ka hmuh hna. Saram a duh i a daw mi si ka theih ko nain amah he ihkhun hrawm tiang in a dawt hna lai ti khi ka ruah phak khawh lo mi a si. A innchung cun țhutnak ngai a um lo caah a ihkhun cung ah cun kan țhu i bia kan i ruah. Ka nu ….. tiah ka auh tawn mi a si i ka nu ……GCAC nubu nih X’mas laksawng an in kuat i ka rak in pe tiah ka ti. A hna a chet pah caah ka fa zeitin ee tiin a hnakhaw fak piin a tun.

A leng cu a ceu pah rih nain a inn cu thlalangawng țhațhi ngai in tuah mi a um lo caah a mui ngai. Khuapi a si caah lam hmanh mei in a ceu dih cang mi lak ah anih inn cu mui dipdep tein a um caah kan hmur zoh in bia kan i ruah khawh lo caah a hnakhaw hram cun fak deuh in ka hei chimh i lawmhnak bia tam lak a chim. Cun thluachuah za a hal piak hna. A lunglawmhnak cu an sin ah na ka chim piak hrimhrim lai tiin bia a ka cah.

Sau nawn bia kan i ruah hnu ah ”ka nu …… bu rianțuannak in an in kuat mi a si caah na muihmai hmuh an in duh i hman kan thla kho maw?a leng ah ka chuah ter lai lo”tiin ka hal i a ngah ko ka fa tiah a ka leh. Innchung cu a muih ngai caah a leng ah kan thlak ko lo tiah ka sawm. Innleng cun a dir i hman cu ka thlak.

“Ka fa rianrang tein ka thla awh mi nih an ka hmuh sual lai” tiah a ka ti i cu nih cun khua tampi a ka ruahter. Mi kan bawmh tik hna ah hmaihngal ngai in hman kan i thlakpi tawn mi hna le facebook cahmai ah kan tar hna hi laksawng a dongtu caah cun a nuam lo hrimhrim ti khi ka ruat.

Cun a hmanthlak cu ka piah i ”nai rem tuk” tiah ka ti i ka fa tu cu ka der tuk cang le dawh kai dawh ti loh cuh. Ka rak thau lio cun amah nih hman a rak ka thlak le kai rak rem tuk cuh ti pawl cu a nungak deuh lio ai dawhnak kong a bia a peh i sau ngai bia kan i ruah țhan. Mah ai rem tuk nak hmanthlak cu ramdang um mi nih kan in ngai an ka ti le ka kuat le kai chir ngai ti pawl khi capo pah in a ka chimh.

Innleng ahcun ka chuak i ka fa uite kha van luh a vak tuk a ka ti i a ui fate cu ka hei luh piak. Mah ahcun ”Nute hi cu vah na cak tuk. Zan ah a ka kawl ka har tuk ti hi na thei loh maw?”tiin a sik pah. Ka mirh pah buin inn lei ka kir țhan.

Tuchun cu keimah ka rian kong le a dangdang ah ka lung a ba ngai i rawl ei hmanh kai huam lo nain GCAC nih an kuat mi hna X’mas laksawng ka va pek piak mi nih cun ka lung a ka hliphlauter ngai țhan. Keimah cu laksawng a pek piak tu men hna ka si i keimah hmanh mahtluk kai lawmh cun petu le cohlangtu zeitluk in dah an i lawmh hnga ti khi ka ruat.

Khrihfa kan sinak ah bantuk in sifak harsa kan bawmhnak hna hi țhul hrimhrim hna hlah usih. Jesuh khrih chuah caan ah mifim pathum hna le tuukhal hna nih Jesuh kha laksawng an rak pek bang kan caah a rak chuak mi naute chuah laksawng pek can ah kan pawng i a hrasa mi hna laksawng pek le kan sining hrawmpi philh hna hlah usih!

GCAC nubu hna nan rianțuannak ah Pathian nih thlua in chuah chin ko hna seh. X’mas thla nih a chuahpi mi daihnak, lawmhnak le hnangamnak cu pakhat cio nan cung ah tlung hram ko seh! Hmanthlak hi ka nu…. tiah ka auh mi i a umnak inn a si. Source: Mercy Meng

Note: Hi thawngpang hi Mercy Meng nih amah pumpak timeline ah ataarmi kan rak lakchinmi a si. Mipi theih ah taar a phu ko tiah kan ruah caah kan rak taarnak a si.