Senior General Min Aung Hlaing nih hruai mi Council cung ah ka lawm” tiah Dr. Aye Maung nih a ti. NLD cozah chan ah tlaih le thongthlak a rak tong mi Dr. Aye Maung nih February 12, 2021 thong in luat ter asi mi kong he pehlai in “luat ter ka si caah ka lawm tuk. Lunglawmhnak leiba zong ka ngei.

Hmasabik ah Rakhine mipi cung ah ka lawm. Thonginn chung ka rak luh hlan tein thazaang pe tu an rak si, thong chung ka um lio caan zong ah thazaang an ka pek, keimah luat kho nak ding caah a lam kip in an cawlcang thil tampi an tuah. Cun ULA/AA nih ralkap he ton biaruahnak an ngeih lio ah khan luat nak ding lam an kawl cu caah ULA/AA cung ah ka lawm.

Cun thong in a ka luat ter tu Senior General Min Aung Hlaing hruaimi State Administration Council cung zong ah ka lawm. An mah nih luat ternak thawng in asi. Ref – Development Media Group & CCN

Relchih: Ṭih Hlah Uh, Thawng Ka Thanh Rih Ko Uh! Keimah cu Pathian biakinn ah hla hruai i, ka zuam bikmi biazai le thazaang peknak ṭial te hi ka duh bikmi a si, ka zuam bikmi a si fawn. Atu ka tuahmi hi ka ttuanmi rian he zong ai kalh. Vawlei cungah a him bikmi ram ah a um i hnangam tukin a ummi ka si ko. Hawi dang cio bang dai tein a um khomi ka si.

Caṭial zuammi men men ka si. Lainu zapi sin a langmi ah a nauta bikmi ka si. Midang ruangah Pathian ka cungah ai lawm lai lo ding a ṭih tukmi ka si ko. Asinain Kawlram ralkap nih uknak an vun lak tikah dai tein ka um kho ve ti lo. Ka cattialnak cakuang pi cu mino hna an duhmi phuan nak caah ka phah.

A tanglei ka post mi bangin ca ka postmi pawl hi keimah duh in ka postmi ai tel lo. Thantlang kong zongah palik nih hmuh ruangah lungfak tukin bia porh hna seh law, i runvennnak a hlei luat in hung ka chim hna seh law sual ka phaw hna lai lo. Palik le ralkap kutin an tem tuk ve tikah an i khamhnak a si ve ko. A chimtu min an theih i thong a tlak dingmi nakin, keimah fb ah an ka ti kha ka tuar khawh deuh lai.

A thin a tawi tukmi ka si caah hin, i siknak ah i tel ka duh lo. I sik loin a si khawh chungin i rem i thil sining i fianh a duhmi ka si. Ka palh zong palh lo zongah ka ngai thiam ka ti ruangah buainak a dam a si ahcun ka ngaithiam ti hi ka chim pengmi a si. Nain caan tampi cu biafak in an ka ti tikah thin i sum loin mi leh ka hmang. Cucu ka der thawm biknak a si.

Ka min zong tampi nan rak hmuh lai.. Lih in ca a ṭial timi pawl zong. Asinain Lairam ummi hna an him a si ahcun keimah ka min cu chia rih ko seh. Ralkap uknak an duh lo tuk lio a si caah an ka fial tein ka ṭuan rih ko lai. Hi kan ralpi a dih in keizong dai tein ka um lai i Biazai le thazaang peknak lawng ka ṭial ṭhan te lai. Kan ralpi a dih hlan cu mi mit kem chung rih ko ning mu. Credit: Nusung Htg – Nunu