US ram, Indianapolis khua ah a ummi Ngalang khuami Pu Thawng Lian Thang le Ngalang khuami Pi Meng Meng hna i an fale 5 lakah upa bik chang asimi tlangval Bawi Uk Lian cu pumpululh chuih a thiamnak leiin University of Indianapolis nih full scholarship an pek i atu hi Sports Management in bachelor degree dih tiah kan theih.

Bawi Uk Lian hi Aba Phutin tiin an auhmi zong a si i Indiana state ah a ummi Fort Wayne FC ah laikal (center midfielder) in a chuih cuahmahmi asi. Cun, amah hi kum 22 te lawwng a si rih nain, atu bantuk dirhmun tiang a phakkhawhmi hi Mino caah zohchun awk tlak ngaingai a si.

“2016 Southport High School ah ka dih i a tu hi University of Indianapolis ah Sports Management in bachelor degree ka dih ka bak si. Scholarship ka ngah ka ahhin ka nuam ngainagi. A ruang cu College hi ka kai kho lai ti ka ruat bal lo. Aruang cu College kai a har ngaingai i phaisa zong tampi a dihmi a si. Keimah zong Pathian nih a ka zaangfahnak i ruah lo piin Scholarship ka ngah i kaa lawm ngaingai,”.

High School ka kai lio ahhin University of Indianapolis leiin Full Scholarship offer a kan tuah cang. Hi hlan ahhin College showcase zongah ka chuih i cu ka ahcun College Coach (pumpululh cawnpiaktu) pawl nih an kan zoh tawn ve cu cun Gmail in pehtlaihnak an kan tuah colh. Ka chuihnak Club Coach pawl zong an chim hna i, mah player pa hi kan uar ngai, kan sianginn ah rak kan leng seh tiah an chimh hna i cu cun aa thawkmi ka si,” tiah Aba Phutin nih cun a chim.

“Pathian nih a ka dawt i pumpululh chuih leihi pahrang a ka pekmi a si rua tiah ka ruah. Aruang cu ka nulepa tbk (ciikor) in bawlung chuih a thiammi hohmanh an um lo. Kan ngakchiat lioah bawlung hi ka rak chuih pah lengmang. Kan khua tbk le Malay tbk hna ah chuih sawsawh cun kan rak chuih peng ko hna. Asinain biatak tein chuih hram kaa thawk hi cu US ka phak hnu in aa thawkmi ka si,” ati a chim.

“Pumpuluh chuihthiam lak ahcun ka uar or duh bikmi cu Cristiano Ronaldo hi ka uar bik. Ka uar biknak a ruang cu, aa zuambik mi le tei a rial bikmi a si tiah ka ruah cucaah ka uar biknak hi a si,” tiah a chim.

Nulepa sin le Mino sinah biacahnak a chimmi cu,“ Pumpululh chuih le a zei lei paoh nuelpa nih thazaang peek hi kan herh taktak. Nulepa nih thazaang peek lo ahhin cun kan i tinhmi le pumpululh chuih lei a si ahcun Professional tiang phak khawhnak tiangah khin nulepa nih thazaang nan kan peek lo cun kanmah kutke tein cun zeitik ah kan phak kho lai loh. Miraang phungthluk ah ka uar ngaimi cu,“Where there’s a will, ther’s away” (Duhnak a um ahcun lam a um timi hi ka uar ngai). Mino sinah chim ka duhmi cu kan duhmi le kan timhmi kha kan duh taktak ahcun lam a um ko. Amahbelte kan timhmi hmun pakhat ahcun apakhatnak ah Pathian ibochan. Cun, mah le mah izuamank, teirial le dinfelnak zong a herh ti hi chim ka duhmi a si,” tiah Chin mino le nulepa sinah biacahmnak a ngeih.

Chin Tube timi hmehpiak law interview ah tling tein zoh khawh a si.