Fim le Hruh Hi Zei Set Dah An Si? Salai B. Chan Khar

Theihtlei

Fim le Hruh Hi Zei Set Dah An Si?

Image may contain: 1 person, smiling, cloud, sky, car and outdoor

Hi biatlangtar nih hin ka lung a ka tuai ial. Cucaah online ah an tialmi cabia ka kawl hna le pali leng ka hmuh hna. Ka lung ah a taap mi tlawmpal ka rak tial hna.

1. Haltin Thei Saya le Sianghngakchia

Mihrut nih cun, zeizong an hngalh dih, biahal paohpaoh hngalh lo le leh khawh lo an ngei lo. Mifim tu cu, sianghngakchia bantuk in, an tonmi kip ah fimnak i lak awk an kawl, an chan chung sianghngakchia bantuk in an cawng.

2. Mi-Uah le Mitoidor

Mihrut cu, an lung a puam leng ah an hmurkaa a puam fawn. Mah uah khin an i uah le hawi nak sang deuh in an i ruat. An bia kha bia bik ah an ruah le ‘Keimah bia in biatlu seh’ ti a chuak. Mifim tu cu, mi toi ah an i dor leng ah zaangfahnak an ngei hrimhrim. Meeting ah phungpheng tiah an holh colh lo. Hawi bia tu an ngai hmasa i, a donghnak ah bia an chim tawn. An bia hmual a ngei (Max Cowell’s Leadership Book).

3. Dong Lo Holh le Mi Biangai

Mihrut cu, an thawchuah zat in an holh, an lungchuak paoh ruat cungcang lo in an chim toptop. Mi biangai lo in bia an tan u-ut. A fimnak langhter khawh an i zuam nain a hrutnak a phuang chin. Mifim tu cu, mi biachim tthate in an ngai. An chim duhmi hngalhpiak an i zuam. Ruatrat lo in an hmurkaa a tam lo, mi biangaitu deuh an si. Tehte ka hun khan ve. Pumpak in mifim ah ka ruahmi hna pawl khi, bia an chim huaha taktak lo, tthate in mi bia tu an ngai ti hi ka hmuhton thil a si ve.

4. Hleihluat Zum le Lunghring

Mihrut cu, ahleihluat in anmah le mah an i zum. Cucaah anmah le mah sang tuk i an i chiahnak cu a si. Mifim cu, anmah le mah an i lunghrinh. Cucaah a si tak le si tak lo an hlat, mi bia an hal. Cucu an fimnak zawn a si. Anmah le mah kha mifim an si an i zum lo. Cu tik ah mifim chung ah a um ve mi hruhnak kha a lang lo.

5. Ruahnak Cheuh le Ruahnak Hal

Mihrut nih cun, midang ruahnak va cheuh kha an duh ngaingai. Asinain ruahnak pipa hal an tong bal lo. Mifim tu nih cun, ruahnak hal awk a tlakmi minung kha ruahnak an va hal tawn hna. Ruah awk a si mi cu, Laimi he bia i ruah fatin, ruahnak cheuh hal lopi in midang ruahnak kan va cheuh lengmang hna khi ‘hruh hmelchunh liulio’ a si ko lo maw? Hruh le fim hngalhnak dingah bawmtu a si hmanh maw tiah tial kai tinh mi a si. A tam cang le ka phih lai.

Credit: Salai B. Chan Khar

Leave a Reply