March 11, zaanlei suimilaam 2:00 hrawng, Falam Meithat zuung thlang ah ram mei a kaang i Penguk (GAD) Quarters, DRD zung thilri chiahnak le Electric zung pawngkam ah tihnung ngai in mei a kaang i Falam meithat zung motor pahnih le meithat minung 30 leng nih mei an phalh cuahmah tiah kan theih.

Hi ram mei kanghnak kong he pehtlai in, “Atu mei hi Kalay lei rak kainak Lailun lam in aa thok mi a si rua. Mei a alh ning hi a fak ngai ca ah tih a nung. A pawng ah Falam Electric zung, Penguk zung le DRD zung a um i, hi zung hna hi a va phak khawh mi a si. Atu tiang ahcun inn a kanghchih mi a um rih lo. ,” tiah min langhter lo mi pakhat nih The Hakha Post ah a chim.

Cun, “Atu mei a kangh hi a caan cu fianglak in kan chim kho lo. Kan zung in meithat minung 30 nih mei kan phalh i suimilaam zeimawzat kan phalh hnu ah 3:20 hrawng ah mei kan thah khawh cang,” tiah Falam Meithat zung lutlai sin in kan theih. Credit: The Hakha Post

|| Hi thawngpang hi The Hakha Post le Chinland heralddailynews ta kan lakchinmi a si. The Hakha Post nih a tarlanghning ah cun hliamhma tuarmi an um rih lo||